Siulittaasoqarfimmi ilaasortat tunuartariaqarnissaat Otto Jeremiassenip aalajangiusimavaa
– Ruth Heilmann inatsisartuni siulittaasunngorusulluni ullumi sassartuugaluarpat akerliullunga taasissagaluarpunga, Otto Jeremiassen oqarpoq. Otto Jeremiassenip erseqqissarpaa taasissussisarnerit peqqeqqunagit aamma assingusumik pisoqaqqissagaluarpat qanoq pillaasoqartarnissaanut partii siunnersuusiorluni aallartereersoq.
Otto Jeremiassen piffissami kingullermi pisumut oqaaseqartikkuminaappoq erseqqissaavorli Ruth Heilmannimik isornartorsiusarnini pissutigalugu parteeqatiminit siulittaasuminilluunniit nipangersitaasimanani.
– Oqaatsikka tamaasa aalajangiusimavakka, Otto Jeremiassen oqarpoq.
Inatsisartuni taasissussisarsimanerit pillugit Partiip Siumup iluani aaqqiagiinnginneqartoq, Siumup iluani suliniaqatigiiffiup “Alloriaqqiffiup” tusagassiuutinut nalunaarutaani erserpoq.
“Siumup siulittaasuata Inatsisartuni gruppeni aqussinnaanngikkaa uppernarseqqikkujarput” Suliniaqatigiiffik tusagassiuutinut nalunaarummi allappoq. Siumup iluani suliniaqatigiiffimmi Alloriaqqiffimmi ilaasortaapput. Peter Frederik Lyberth, Kalistat Lund aamma Markus E. Olsen.
Taakkua aperipput, sooq Politiinut suliassiissutigineqassasoq partiip iluani aaqqinneqarsinnaasoq.
Siumut inatsisartunut ilaasortaatitaasa ippassaq ataatsimiinneranni aalajangiunneqarpoq, ataatsimiinnermi aalajangiunneqartut naalakkersuisut siulittaasuannit Hans Enoksenimit avammut nalunaarutigineqassasut.
Siumup inatsisartuni ilaasortaatitaasa politiinut nalunaaruteqarnissaq unitsippaat, innuttaasut ilaannit politiinut nalunaaruteqartoqareermat.
Inatsisartunut ilaasortat taasissussisut siunissami ingerlaannartumik inatsisartunut ilaasortaajunnaarsinneqartalernissaat ataatsimiinnermi siunnersuutigineqarpoq.