Siulittaasoqarfikkoortumik nassuiaaqqusipput
Ingerlatseqatigiiffinnik allattoqarfiup naalakkersuisut siulittaasuannit oqartussaaffigineqalernera partiit naalakkersuisunut illuatungiliuttut naammaginngilaat, Royal Greenlandimilu pisimasut eqqissiviilliuutaasimaqisut pillugit nassuiaasoqarnissaa piumasaralugu.
Atassut inatsisartut siulittaasoqarfiannut maanna saaffiginnissuteqarpoq, naalakkersuisut nassuiaateqarnissaat piumasareqqullugu.
- Kukkuluttortoqarsimanera naalakkersuisut siulittaasuata nassuerutigereerpaa. Aamma apeqqutit akineqanngitsut amerlangaarmata Royal Greenlandillu illersorneqarsinnaasumik ingerlanneqarsinnaanera qulakkeerneqarsimanngitsutut isumaqarfigigatsigu nassuiaasoqarnissaa piumasaraarput, Augusta Salling tunngavilersuivoq.
Jørgen Wæver Johansenip oqartussaaffigisaanik Ingerlatseqatigiiffinnik allattoqarfimmik naalakkersuisut siulittaasuata Hans Enoksenip tigusinermini tunngavilersuutigaa, Royal Greenlandimi pissutsit eqqissiiminissaat pillugu oqartussaaffimmik tigusisimalluni. Tamannali Atassutip naammaginngilaa.
- Sulisut eqqissillutik sulinissaat pingaarpoq, kukkuluttuutigineqarsimasutulli nassuerutigineqartut suunersut erseqqissumik paasisariaqarpavut, Augusta Salling erseqqissaavoq.
Royal Greenlandimi pisimasut pillugit nassuiaasoqarnissaa Demokraatit aamma piumasarisimavaat, taamaattumik aalisarneq pillugu nassuiaammik naalakkersuisut inatsisartunut saqqummiussilerpata nassuiaasoqarnissaa naatsorsuutigilluinnarlugu, Demokraatit siulittaasuat Per Berthelsen oqarpoq.
- Naalakkersuisut kiisalu Royal Greenlandimi siulersuisut tamarmik assigiinngitsunik oqalussimapput. Taamaattumik pisimasunik iternga tikillugu paasiniaasoqarlunilu nassuiaasoqassasoq piumasarisimavarput. Aamma ajornartorsiutit oqartussaaffimmik nuussinikkut qimagunnavianngimmata akisussaasumut kinguneqartitsisoqassasoq piumasarisimavarput, Per Berthelsen nassuiaavoq.
Kattusseqatigiinnit Anthon Frederiksenip aamma neriuutiginerarpaa, aalisarneq pillugu nassuiaat naalakkersuisunit saqqummiunneqalerpat Royal Greenlandimi pisimasunik aamma nassuiaasoqarumaartoq.
