Siulittaasoq qinigaaqqippoq
- Ataatsimeersuarnermi Demokraatit ullumimut naleqqiullugu annerulersinniarlugit annertuumik suliaqarnerup nanginneqarnissaa isumaqatigiissutigineqarpoq, Allan Chemnitz unammillerneqarani siulittaasutut qinigaaqqittoq taama oqarpoq.
Siulittaasup tullertaavatut qinerneqarpoq Aviaaja Karlshøj Poulsen, issatsiaq folketingimut qineqqusaartunut ilaasoq.
Karen M. Lynge aningaaserisutut ingerlaqqippoq, Anda Uldum aamma Michael Rosing siulersuisuni ilaasortanngorput.
Kenneth Mortensen sinniisussatut siullertut inissippoq, Bent Olsvig sinniisussatut aappaatut, kiisalu Michael Sommer sinniisussat pingajuattut inissilluni.
- Immikkoortortaqarfiup siulersuisuini piffissami aggersumi suliassat pingaarnerit ilagissavaat tulliani kommunalbestyrelsimut qinersinissamut qinigassanngortittussanik piukkunnarluartunik ujaarlernissaq, qinersinissami tassani Demokraatit Kommuneqarfik Sermersuup kommunalbestyrelsiani maannamut ilaasortaasunit pingasuusunit amerlanerit qinigaatinnissaat anguniarpaat, Nuummi Demokraatit taama nalunaarput.
