Assi: KNR

Siulittaasoq peqqissuseq pillugu: Sukkunut, aalakoornartunut cigarettinullu akitsuutit kisimik naammanngillat

Peqqinnerulerniarutta imigassanik aalakoornartortalinnik, sukkunik mamakujuttunillu akitsuusiinerup saniatigut allanik suliniuteqartoqartariaqartoq, ataatsimiitsitaliami siulittaasoq isumaqarpoq.

Akitsuusiineq imigassamik mamartukujunnillu atuinermik millisitsinanilu inuit peqqinnerulernissaannut iluaqutaanngitsoq maanna oqassalluni siusippallaarpoq.

Peqqissutsimut ataatsimiititaliami siulittaasoq taama oqarpoq. Akitsuusiinerinnakkut inuit peqqinnerulernavianngitsut taanna isumaqarpoq.

- Neriuppugut piffissaq ungasinnerusoq eqqarsaatigalugu iluaqutaajumaartoq, Ilaqutariinnermut Peqqissutsimullu Ataatsimiitsitaliami siulittaasoq, Demokraatineersoq, Malene Vahl Rasmussen taama oqarpoq.

Peqqinnanngitsunik tunisisarneq nikerianngitsoq

Demokraatit peqqinnerulernissaq anguniarlugu akitsuutinik qaffaanissamik siorna aalajangeeqataapput.

Akitsuutit imigassanik aalakoornartortalinnik, mamakujuttunik sukkunillu akisunerulersitsipput. Taamaakkaluartoq akitsuutit atuutilerneranniit qaammatit qulingiluat qaangiummata, Pilersuisumi, Brugsenimi Pisiffimmilu nioqqutissat peqqinnanngitsut tunisat allannguuteqanngitsut KNR-imut nalunaarutigaat.

AAMMA ATUARUK Afgifter på usunde varer skræmmer ikke forbrugerne  

Brugsenimi tuniniaanermut pisortaq, Jes Nyborg tunisat allannguuteqannginnerannut tupaallanngilaq. Taassuma sukkunut akitsuutit 2015-imi qaffanneqarnermata pissutsit assersuusiaraa.

- Sukkunut akitsuutit juullimut niuffaffiuleruttortoq qaffanneqangaatsiarput. Takusinnaasagut malillugit tunisagut akitsuutit qaffaqqaarneraniit piffissami sivikitsuinnarmi appariaateqalaaraluariartik, pisisarnermittut tunisaaqqilerput, taanna oqarpoq.

Allanik suliniuteqartoqartariaqartoq

Inuit peqqinnerulernissaat anguneqassappat akitsuutaannat peqqinnerulersitsinavianngitsut, Malene Vahl Rasmussen isumaqarpoq.

- Kisitsisit marluk taakku sanilliukkaanni, takutiinnarpaat akitsuutinik eqqussuineq kisimiilluni pitsaaliuinavianngilaq. Sulianik allanik aamma imaqartariaqarpoq.

- Nunarput siuarsarniarlugu akitsuutinik eqqussuinissaq immaqa tulluarnerpaanngilaq.

Naalakkersuisut Steno Diabetes Centerimik, tassa sukkortunut sullissivimmik, inooriaatsimik pisuteqartumik napparsimalernisamik pinaveersaartitsinissamik suleqateqalersimasoq, Malene Vahl Rasmussen oqarpoq.

Nunatsinnilu inuit 2030-imi nunarsuarmi aalanerpaanngornissaanut Kalaallit Nunaanni Timersoqatigiit Kattuffiannit anguniarneqartoq ataatsimiititaliamiit tapersersoritsik ilanngullugu oqaatigalugu.

 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat