Siulittaasoq: Inatsisinik unioqqutitsinerunngilaq
Inatsisartut aningaasaqarnermut ataatsimiititaliaata Nukissiorfinnik ataatsimeeqateqarnerani, ineqarnermut attaveqarnermut angallannermullu naalakkersuisoqarfimmi atorfilimmik peqataasoqarnera, Aningaasaqarnermut ataatsimiititaliap siulittaasuata Nauja Nathanielsenip naammagittaalliorsimasussaagaluarneranik, ilisimatuup Claus Haagen Jensenip oqarnera maanna akissuteqarfigineqarpoq.
Nittartakkami Sermitsiaq.Ag-mi allaaserisaq najoqqutaralugu, Naaja Nathanielsen isumaqarpoq, Claus Haagen Jensen kukkusunik tunngaveqarluni oqaaseqartoq.
. Tassami Inatsisartut aningaasaqarnermut ataatsimiititaliaa nalinginnaasumik ataatsimiinngimmat, Nukissiorfinnulli pulaaginnarluni. Aamma aningaasaqarnermut ataatsimiititaliap Nukissiorfinnut pulaarnissaa ullunik qulingiluanik sioqqullugu, ineqarnermut attaveqarnermut angallannermullu naalakkersuisoqarfimmit peqataasoqarnissaa ilisimatitsissutigineqartoq, Naaja Nathanielsen aviisimut oqarpoq.
Atorfillip peqataanera pillugu ajortorsiut pilermat, aningaasaqarnermut ataatsimiititaliaq matoqqasumik sivikitsumik ataatsimiippoq. Tassani ataatsimiititaliap allattaanit nalunaarutigineqarpoq, atorfillip peqataanera inatsisinik unioqqutitsinerunngitsoq.
Taamaattorli atorfillip peqaatanera pisariaqarsimanngitsoq isumaqatigiissutigineqarpoq, tamannalu naalakkersuisunut ilaasortamut akisussaasumut Jens B. Frederiksenimut nalunaarutigineqarpoq.
- Aamma isumaqarpunga ilisimatuup soraarnerup taassuma pisimasup tunngavippiaa paasiniarsimasariaqaraluaraa, paasissutissanik pisariaqartunik tunngavissaqanngitsunik oqalunnani, taamalu Kalaallit Nunaanni oqallinneq soqutiginartoq paatsiveerussarnagu, Naaja Nathanielseni sermitsiaq.ag-mut oqarpoq.