- Politikerini arnat angutillu assigiissumik agguataarsimagaangata tamatigoornerusumik eqqarsaatigilluagaanerusumillu aalajangeeqatigiittarput, Kathrine Bødker oqarpoq. Assi: KNR / Marie Kuitse Kristensen

Siulittaasoq: Arnat angutillu ataatsimooraangamik tamatigoornerusumik aalajangeeqatigiittarput

Naleqqap Kirsten Fencker arnaammat peqqissutsimut naalakkersunngortussanngortippaa. Arnat angutillu agguataarsimanerannik ukkassineq nuannaarutissaasoq, nunatsinni naligiissitaanermut siunnersuisoqatigiit isumaqarput.

- Arnat angutillu agguataarsimanerat tallimanngormat saqqummiunneqarmat nuannaajallaqaanga. Inatsisartunummi qinikkat arnartaannit agguaqatigiisillugu amerlanerummata pitsaaneroqaaq.

Kalaallit Nunaanni Naligiissitaanermut Siunnersuisoqatigiit siulittaasuat, Kathrine Bødker, taama oqarpoq.

Naalakkersuisunngortussat Inuit Ataqatigiinnit Naleqqamillu talllimanngormat saqqummiunneqarput, naalakkersuisunngortussallu quliusuni sisamat arnaapput. 

Innuttaasullu agguataarsimanerisa nunatsinni politikerit siuttuini arnat angutillu agguataarsimanerini ersersimanissaa pingaaruteqartoq, siulittaasoq erseqqissaavoq. Tamannami politikkikkut sulinermut aamma sunniuteqassammat. 

AAMMA ATUARUK Hans Enoksen: Arnat amerlanerusut sunniuteqalernissaat qulakkerusupparput

- Politikerini arnat angutillu assigiissumik agguataarsimagaangata tamatigoornerusumik eqqarsaatigilluagaanerusumillu aalajangeeqatigiittarput, Kathrine Bødker oqarpoq. 

Inatsisartunut apriilip ulluisa arfernanni qinikkat 31-usut pingajorarterutingajaat, tassa qulit, arnaapput.

Naleqqamit qinikkat arnartaqanngitsut

Naleraq partiini Inatsisartunut arnamik qinigaatitaqanngitsoortunut ilaavoq. Partiilli tamanna naalakkersuisunngortussanik arnanik angutinillu agguataarinermi qitiutissimavaa. 

Tamannalu Naleqqap Kirsten Fenckerimik qinigaanngikkaluartumik peqqissutsimut naalakkersussanngortitsineranut peqqutaasunut ilaavoq. 

- Siullermik Naleqqap arnat angutillu agguataarsimanerannik ukkassinera nuannaarutissaavoq. Partiip Inatsisartunut qinigassanngortitaasa arnartaannit agguaqatigiisillugu amerlanerunerannik ersersitsinera nutaajullunilu allaavoq.

- Naleqqammi Inatsisartunut qinigassanngortitaasa ilaminiinnanngui arnaapput, Kathrine Bødker oqarpoq.

Naleqqap Inatsisartunut qinigassanngortitaani 30-usuni arnat sisamaapput.

AAMMA ATUARUK 100 flere mænd end kvinder stiller op til kommunalvalget

Arnanilli ilaqarnissartik pingartittorujussuugitsik, Naleqqap siulittaasua oqarpoq. Arnammi amerlanerusut partiitsinni aamma isummersoqataallutillu sunniuteqarnissaat qulakkeerusuppaat:

- Arnarpassuit ajukkunnanngikkaluarlutik tunuarsimaarnerat qaangerusullugu tassuuna ikkussivugut, periarfissaariarmat.

Naligiissitaanermut siunnersuisoqatigiinneersorlu, Kathrine Bødker, isumaqataavoq:

- Naalakkersuisulli arnartaqarlutillu angutitaqarnissaat pingaaruteqartutuaasorinngilara. Angutit arnallu assigiinngitsunik aamma ukkassisarput. Naleqartitatik assigiinngitsut tunngavigalugit pingaarnersiuisarput.

Taassuma Naleqqap siulittaasuata arnat tunuarsimaarnerusinnaaneraaneranut aamma isumaqataavoq. Taamaammat tarrarsorfigisinnaasanik allanik arnartaqarnissaa pingaaruteqarpoq.

- Maligassiuisortavut inuiaqatigiinnut qularnanngivissumik kajumissisitsisarlutillu isumassarsisitsisarput.

Naalakkersuisunngortussat Inatsisartunit tallimanngorpat pisortatigoortumik akuerineqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat