Siulersuisuuffinni arnat amerlanerusariaqarput
Namminersornerullutik Oqartussat suliffeqarfiutaani siulersuisuuffinni angutit amerlaneruallaartut arnallu amerlanerit siulersuisuuffinni inissinneqartarnissaanut, Kalaallit Nunaanni Naligiissitaanissamut Siunnersuisoqatigiit isumaqarput.
- Naligiissitaanissamut inatsiseqarpugut, tassanilu allaqqavoq siulersuisuni taavalu pisortat suliffeqarfiutaanni siulersuisuni inuttat sapinngisamik arnat angutillu amerlaqatigiissasut, taannalu maannakkut namminersornerullutik oqartussat suliffeqarfiutaani inatsit iluamik malinneqanngilaq, siulersuutinneqartut amerlanerpaartaat angutaammata.
Naligiissitaanissamut siunnersuisoqatigiit siulittaasuat Agathe Fontain isumaqarpoq ullumikkut arnat ilinniarluarsimasut siulersuisunilu ilaasortaasinnaasut piukkunnartut amerlasut, atorluarneqanngitsullu. Agathe Fontain aamma isumaqarpoq, Namminersornerullutik oqartussat suliffeqarfiutaani siulersuisuni ilaasortanngortitsisarneq pisarpallaartoq nammineq ilisarisimasanik siulersuisunut ilanngutsisarneq, taamaammat avammut qiviarnerulaarluni piukkunnartunik nassaarsioraanni nassaartoqarsinnaasoq, Agathe Fontain oqarpoq.
Arnat ilinniarluarsimasut siulersuisuni ilaasortaasinnaasut piukkunnartut atit 70-it missaanniittuut Agathe Fontain-ip ilanngullugu aamma oqaatigaa.
