Siulersuisut unitsitsiinnarsimassagaluarnerarpaat

Puisi A/S pillugu eqqartuussinerup immikkoortuata aappaa ullumi aallartippoq. Siulersuisuusimasut uparuartorneqarput pisortamillu soraarsitsisimasariaqaraluarnerarneqarlutik.

Namminersorlutik Oqartussat eqqartuussissuserisuata Puisi A/S pillugu suliami akiliisinnaajunnaarnermi pigisat sinnerlugit amigartoorfiusumi, ullumi siulersuisuni ilaasortaasimasut, pisortaasimasoq kukkunersiuisimasullu akisussaassuseqarsimannginnerat pillugu akisussaatinniarsarai.

Puisi A/S-ip akiliisinnaajunnaarnerata nalaani 11 millionit koruunit nalinginik amigartooruteqarsimavoq, unnerluutigineqartullu ataasiakkaat qanoq annertutigisumik taarseeqquneqarnerannik nassuiaagami, suliaq paasiuminaallisoq, Namminersorlutik Oqartussat eqqartuussissuserisuata nassuerutigaa, unnerluutigineqartummi ataasiakkaat Puisi A/S-ip akiliisinnaajunnaarneranut assigiinngitsunik sunniisimammata.

Unnerluutigineqartulli-uku akisussaassuseqarsimanngitsut? Qanoq iliornerminni tamani imaluunniit iliuuseqannginnerminni akisussaaffitsik qimarratigisimavaat, Namminersorlutik Oqartussat eqqartuussissuserisuata taama nassuiarpaa. Unnerluutigineqartulli assigiimmik pineqarsinnaanngikkaluartut oqaatigineqartut assigiiaarput.

Siulersuisuni ilaasortaasimasut Puisi A/S siusinnerusukkut matusimanngimmassuk assuarineqarput, ukiakkut 1999-mi mianersoqqussutit malinneqartussaagaluartut Namminersornerullutik Oqartussanut qularnaveeqquseqqullutik qinnuteqaratik, eqqartuussisulersuussinerup tunngavigisaa, Puisi A/S matuinnartussaasimagaluarpaat.

Siulersuisunut ilaasortaasimasunut assuarinninnerup ilagaa, pisortap HP Barlach Christensenip iluamik nakkutiginnissimannginneratigut akisussaffimminnik iluamik paarsinnginnertik takutissimagaat. Siulersuisuni ilaasortaasimasut unnerluutigineqartut eqqartuussivimmi nassuiaatertik, Puisi A/S-ip aningaasaqarneranik paasinninniarsimagaluarnertik, uteqattaartuaraluarpaat, Namminersorlutik Oqartussalli eqqartuussissuserisuata Jesper Müller-ip nassuiaat taanna naammaginngilaa.

- Siulersuisut suliassiissutaat pisortamit suliarineqanngitsut malitseqartinneqarsimanngillat, Jesper Müller oqarpoq.

Ukiamilu 1999-mi - Puisi A/S-ip Namminersornerullutik Oqartussanit qularnaveeqqummik pinngitsiarnerani - HP Barlach Christensenip Puisi A/S-imi pisortatut atorfik saperaa siulersuisut nalunngeriinngikkunikku nalunngittussaagaluarpaat. Tamannalu malitseqartillugu pisortap soraarsinneqannginnera sumiginnaaneruvoq angisooq, Jesper Müller oqarpoq.

HP Barlach Christensen unnerluutigineqartunut ilaavoq, Namminersorlutik Oqartussat eqqartuussissuserisuata qularinngilaa Puisi A/S-imi pisortatut siulersuisut kissaataat piaaraluni malinnagit sulisimasoq, amerlanertigullu siulersuisut sianiginngisaanik. Kinamut aningaasanik nuussinerit amerlasuut, suliffissualiornissamut atugassat, siulersuisut sianiginngisaanik pisortap suliarisimagai, Jesper Müller isumaqarpoq.

- Nalunngivillugu Kinami suliffissuaqanngittoq Kinamut aningaasanik nuussisarnini qimarratigisinnaanngilaa. Puisi A/S-ip aningaasaqarnera sianigisimanngilaa, taamaattumillu eqqortumik aalajangiisimanani, Namminersorlutik Oqartussat eqqartuussisuserisuat taama oqarpoq.

Ullumi ualilluarnerani unnerluutigineqartut eqqartuussisuserisuata saqqummiinini aallartippaa, Namminersorlutik Oqartussat eqqartuussisuserisuata ulluni kingullerni marlunni saqqummiussimasai illuatungilertussaassavai. Tamannalu malinnaavigissavarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat