Siulersuisut tamakkerlugit taarserneqarlik
Eqqumiitsuliornikkut Pinngorartitsisut Ingerlatsisullu Kattuffianni allaffimmi pisortap aningaasaateqarfimmut aalajangersakkat nutaanik piffissamullu tulluunnerusunik taarserneqarnissaa aamma kissaatigaa. Namminersorlutik Oqartussat Bikubenfondenillu tamanna isumagissavaat.
Manasse Berthelsenittaaq Nunafondenip suliffeqarfiit namminersorlutik oqartussat tamakkiissumik ilaannakortumilluunniit pigisaat allat assingalugit siulersuisnut allattoqarfiup ataanut inissinneqartariaqarsoraa. Taamaaliornikkut aningaasaateqarfiup allaffissornermut aningaasartuutai, ukiuni kingullerni annertuupilussuarmik sukkasuupilussuarmillu qaffakkiartorsimasut appartinneqarsinnaaniassammata.
Taamatut iliornikkut Nunafondenimi pissutsit sukkasuumik allanngortinneqarsinnaapput, taamaaliornikkullumi qinnuteqartartut aningaasaateqarfiup aningaasaataasa amerlanersaannik tunineqarsinnaanngoqqissapput, aningaasallu amerlanersaat maannakkutut siulersuisunut allaffissornermullu atorneqaruunnaarlutik.