Siulersuisut taarserneqarnerat annerusumik oqaaseqarfigerusunngilaat
Maannamut siulittaasuusimasup siulittaasullu tulliata KNI-mi siulersuisunit ukioq ataaseq sioqqullugu ilaasortaajunnaarsinneqarnerat immikkut maluginiagassaavoq.
KNI-mi siulersuisut Nuummi Hotel Hans Egedemi ullumi ataatsimeersuarput, ileqquusumik ataatsimeersuartoqarluni.
KNI aningaasatigut ukialunni ingerlalluarsimavoq, 250 millionit koruuninik siusinnerusukkut amigartoorfiusimariarluni, 35 millionit koruuninik ukioq manna sinneqartooruteqarpoq, taakkunannga 20 millionit koruunit missaat Nunatta karsianut nakkartinneqarsinnaallutik.
KNI-lli angusai Naalakkersuisut naammaannartutut nalilerpaat, maannamullu siulittaasuusimasoq Michael Skourup, taassumallu tullersortaa Vagn H. Andersen siulersuisunit tunuartinneqarlutik.
Siulersuisullu aappaagu aatsaat taarserneqartussaagaluit suleqatigilluarsimallugit, KNI-p pisortaanerata Claus Jensenip oqaatigaa:
- Ingerlatseqatigiiffinnik aqutsisoqarfik siulersuisullu suleqatigilluarsimaqaakka, tamanna miserratissaanngilaq, KNI-p pisortaanera Claus Jensen oqarpoq.
KNI-mi siulersuisunik taarsiisoqarnissaa Naalakkersuisut aalajangigaraat, politikkikkullu sulineq KNI-llu ulluinnarni aqunneqarnera immikkoortinneqarluinnarnissaat pingaartinneqarpoq, pisortaanerullu tamanna pillugu annertunerusumik oqaaseqarusunnani.
- Tamanna oqaaseqarfigerusunngilara, Claus Jensen oqarpoq.
KNI-p aqunneqarneranut tunngasunik oqaaseqartitsiniarutta piginnittut, tassa Namminersorlutik Oqartussat saaffigissagivut, pisortaanerup Claus Jensenip siulittaasunngortullu Niels Thomsenip oqaatigaat.
- Isumaqarpunga apeqqut taanna piginnittunut apuunneqartariaqartoq, KNI-mi siulersuisuni siulittaasunngortoq Niels Thomsen oqarpoq.
Taanna Gunnar Gudmundssonimik siulersuisuni suleqateqalissaaq. Gunnar Gudmundsson, uuliasiornermik ingelatsinermik annertuumik misilittagaqarpoq.
Naak KNI-p angusai siornamut naleqqiullugu allannguuteqangaanngikkaluartut, siulittaasup taassumallu tulliata tunuartinneqarnissaat Naalakkersuisut aalajangerpaat.
Naalakkersuisut siulittaasuat Aleqa Hammond tusagassiutinut nalunaaruteqarpoq. KNI ukioq manna ukiup affaanut siullermi angusarissaarsimavoq, ukiorlu tamaat eqqarsaatigissagaanni angusat ilimagisamit minnerussangatinneqarlutik:
- Aktiaateqarluni omgerlatseqatigiiffinni Namminersorlutik Oqartussanit pigineqartuni allanngoriartornerit malinnaavigeqqissaarpagut naammaginanngilarlu angusat ukiup qiteqqunnerani nalunaarusiami ilimagineqartunit taama annertutigisumik allaanerummata, Aleqa Hammond ilaatigut allappoq.
