Siulersuisut nakkutigineqarnerulissapput

Suliffeqarfii tamakkiisumik ilaannakortumilluunniit Namminersorlutik Oqartussanit pigineqartut siulersuisuunerisa suleriaasii, arlaannaannulluunniit attuumassuteqanngitsunit ukiumoortumik misissorneqartalernissaat Naalakkersuisut nalunaarummi saqqummiuppaat.
oktobarip 17-at 2011 07:08

Aappaagumiit atuutilersussami misissorneqartassapput siulersuisuunerit naammassisaqarsinnaaneri, siulersuisuni ilaasortat ataasiakkaat naammassisaat aamma siulersuisuunerit pisortallu akunnerminni suleqatigiissinnaaneri misissorneqartassallutik.

Naatsumik oqaatigalugu, Naalakkersuisut piumasarilerpaat siulersuisuni ilaasortaassagaanni pitsaanerpaamik sulisoqartarnissaa.

Tassalu tamanna siunertaralugu Naalakkersuisut suliniutigilerpaat, siulersuisuni ilaasortat tamarluinnarmik ilaasortaanissaminnut piukkunnarnersut ukiut tamaasa misissuiffigineqartalissasoq.

Naalakkersuisut siunniussaannut ilaavoq partiinut attuumassuteqaraanni siulersuisuni ilaasortaasannginnissaq, ingammik kommunalbestyrelsenut Inatsisartunullu ilaasortat mattunneqarnissaat siunniunneqarluni. Naatsumik oqaatigalugu, siulersuisut partiit politikkii malillugit sulisarunnaassapput.

Siulersuisunut ilaasortaanissamut mattunneqartut allat tassaapput Namminersorlutik Oqartussani qullersatut atorfillit.

Suliffeqarfiit pisortanit pigineqartut pitsaanermik ingerlanneqartalernissaat anguniarlugu Naalakkersuisut piumasaraat, siulersuisut aningaasarsiorluarsinnaasunik ilaasortaqalernissaat. Ingamillu suliffeqarfiit Oqartussanik pigineqartut kisermaassinermillu aningaasarsiortut uani pineqarlutik.

Naalakkersuisut assersuusiornerminni taavaat, Royal Arctic Line arlaannaannulluunniit attuumassuteqanngitsumik ukioq manna misissorneqarmat paasineqartoq 30 million koruunit angullugit sipaarsinnaagaluartoq, tassalu taakku aningaasarpassuit Nunatsinni inuiaqatigiit ukiut tamarluinnaasa akilertarsimavaat.

Naalakkesuisut isumaqarput suliffeqarfissuit pisortanit pigineqartut arlallit aamma aningaasarpassuarnik sipaagaqarsinnaagaluartut taakku misissuiffigineqartalernerisa kingorna. Tassalu tamannarpiaavoq Naalakkesuisut anguniagaat.

Naalakkersuisut piumasaqaataannut ilaavoq, siulersuisut avammut ammanerunissaat ersarinnerusumillu suleriaaseqarnissaat. Siulersuisunut ilaasortat akissarsiaasa aamma suliffeqarfiit pisortaasa akissarsiaat ilanngullugu siunissami saqqummiunneqartalernissaat Naalakkersuisut aamma piuumasaraat. Aammattaaq bonusisiaritinneqartartut, soraarninngornermi immikkut aningaasarsiaritinneqartartut ajunngitsorsiaritinneqartartullu allat saqqummiunneqartarnissaat aamma piumasarineqarluni.