Kukkunersiuisut ataatsimiititaliaata Campus Kujalliup aningaasaqarnerata aqunneqarnerata naammannginnera sakkortuumik isornartorsiorpaa.Assi: Google Streetview

Siulersuisut 2017-imili millionilikkaanik atuivallaarneq pillugu suaarutiginnissimasut

Campus Kujalliup siulersuisuisa siulittaasuata oqarnera naapertorlugu missingersuutinik ukiuni marlunni kingullerni 8,5 millionit koruuninik qaangiiffiusimasunik eqqortitsiniarlutik immikkut aningaasaliisoqarnissaanut naalakkersuisoqarfimmut piumasaqarsimapput.

Campus Kujallermi siulersuisut 2017-imili Ilinniartitaanermut, Kultureqarnermut, Timersornermut Ilageeqarnermullu naalakkersuisoqarfimmut Campus Kujalliup missingersuutinik qaangiineranut atatillugu ataatsimiinnerni arlalinni ilisimatitsisimapput.

Campus Kujallermi siulersuisut siulittaasuat, Karsten Lyberth-Klausen KNR-imut oqarpoq.

- Ukiut tamaasa missingersuutinik malinnissaanata paasigaangatsigu ilisimatitsissutigisarparput. Taamaammat tassuuna naalakkersuisoqarfimmut nalunaarutiginnittarpugut.

Kukkunersiuisut ataatsimiititaliaata Campus Kujalliup, ukiuni kingullerni marlunni missingersuutinik 8,5 millionit koruuninik qaangiiffiusup aningaasaqarneranik aqutsinerup naammannginneranik sakkortuumik isornartorsiuinerata kingorna taama oqarpoq.

Tatiginninnginnermik oqaaseqaat

Kukkunersiuisut ataatsimiititaliaanik isumaliutissiissuteqartoqarnerata kinguneratigut Demokraatit, Atassut Nalerarlu Ilinniartitaanermut, Kultureqarnermut, Timersornermut Ilageeqarnermullu naalakkersuisumut, Peter Olsenimut (Inuit Ataqatigiit) tatiginnikkunnaarlutik pingasunngornermi unnukkut oqaaseqarput.

Naalakkersuisoqatigiit tatiginninnginnermik taasititsinissamik pinngitsoortitsinissamut siunnersuuteqarlutik akissuteqarput, taannalu Siumumit Inuit Ataqatigiinniillu qinikkat 21-t akueraat – Peter Olsen taamaalilluni naalakkersuisuuginnarsinnaalluni.

Peter Olsen tusagassiuutinut nalunaarummi ippassaq ima oqarpoq:

- Kukkunersiuinermut Ataatsimiititaliap kaammattuuteqarnera Naalakkersuisut aammalu Campus Kujalliup akornanni suleqatigiinnissamut ilumooruppara, taamaattumillu sapinngisamik sukkanerpaamik ilinniarfiup siulersuisuinut attaveqassaanga oqaloqatigiinnermik aallartitsiumallunga, pissutsit matumani pineqartut siunissami uteqqinneqaqqunagit.

Campus Kujalliulli siulersuisuini siulittaasup, Karsten Lyberth-Klausenip siulersuisullu sinnerisa Peter Olsenip aallartinniagaa tassa oqaloqatigiinnissaq arlaleriarlutik anguniartarsimagaluarpaat.

- 2017-imili aallartereerpoq, tassa tassani aningaasaliissutit annikippallaartut ilisimatitsissutigeqqaarsimavarput, Karsten Lyberth-Klausen oqarpoq.

Aningaasaliissutissat agguataarnerat

Siulittaasup oqarnera naapertorlugu siulersuisut Campus Kujallermut aningaasaleeriaatsimi aningaasaliissutissat agguataarnerannut pituttorsimasimapput.

Aningaasaliissutissat agguataarnerat tassa imaappoq oqartussat ilinniarfeqarfinni ilinniartut amerlassusaannut aningsaliisarnerat. Aningaasat tapiissutitut tunniunneqartarput, ilinniarfeqarfiillu sinaakkutiliammi iluani aningaasanik agguataarisinnaapput.

- Missingersuutinik annikillisaaniarluta ilinniakkanik matusinissaq periarfissatuaraarput, taamaalioruttali aningaasat akuersissutigineqartut annaassavagut.

- Pissutsini siulersuisut aningaasanik allanngortitsisiuminaaffigisaanniinnikuupput.

Missingersuutinik malinninniarlusi arlaannik iliuuseqarsinnaagaluarpisi?

- Arlalinnik iliuuseqartoqarnikuuvoq. Sulisunik ikilisaanikuuvugut, ininik attartortukkanik atorunnaagaqarnikuuvugut, taamaammat sapinngisatsinnik iliuuseqarnikuuvugut, siulittaasoq oqarpoq.

Missingersuutinut akisussaaffik

Siulersuisut siulittaasuata oqarnera naapertorlugu naalakkersuisoqarfimmit immikkut aningaasaliisoqarnissaanik qinnuteqarnissaq kisimi periarfissaasimasoq, 2017-imili aamma taamaaliortarsimagaluarput.

Missingersuutini millioninik qaangiinerup ilisimatitsissutiginissaanut siulersuisut iliuuseqarsimasinnaagaluarnersut apeqqummut, Karsten Lyberth-Karlsen ima akissuteqarpoq:

- Siulersuisutut sapinngisatsinnik iliuuseqarsimalluta isumaqarpugut.

Missingersuutit malinneqannginnerat kia akisussaaffigaa?

- Inatsit naapertorlugu siulersuisut tamanna akisussaaffigaat.

Taava ilissi uani kukkussuteqarpusi?

- Oqaatigiuminaappoq, qanormi iliussagaluarpugut? Suliniutit matussagaluarpagut? Tamanna akisinnaanngilara, kisianni suliniut matugutsigit anignaasaliissutit taava annaassavagut, siulittaasoq oqarpoq.

Naalakkersuisoq Peter Olsen apersorneqarusunngilaq, KNR-imulli mailikkut akissuteqarluni allappoq:

- Suliaq ingerlavoq, allanik oqaasissaqanngilanga, tusagassiuutinulli nalunaarutiga innersuutissuara. Siulersuisut tusagassiiviit aqqutigalugit oqaloqatiginissai inissaminiinngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl