Siulersuisunut ilaasortat ima akissarsiaqartinneqassapput

Siulittaasut ilaasortat nalinginnaasut akissarsiaannut naleqqiullugit pingasoriaatit affaannik annerusunik akissarsiaqartinneqalissapput.
Allattoq mlk, Simon Uldum
apriilip 25-at 2014 03:51

Siulittaasunut, siulittaasup tulliinut ilaasortanullu nalinginnaasunut akissarsiat 2009-mili qaffanneqarsimanngillat. Suliaannullu piumasaqaatigineqartut assigiinngisitaarmata ilaasortanut assigiinngitsunut akissarsiaritinneqartartut annertussutsimikkut assigiinngissuteqalissapput.

Tamatuma malitsigisaanik ilaatigut siulittaasut ilaasortat nalinginnaasut akissarsiaannut naleqqiullugit pingasoriaatit affaannik annerusunik akissarsiaqartinneqalissapput.

Taama akissarsiaqartitsilernerup kinguneranik Royal Greenlandip siulersuisuini siulittaasoq Niels de Coninck-Smidt - aktiaateqarluni piginneqatigiiffinni amerlanerpaanik akissarsiaqartinneqartoq - ukiumut 500.000 koruuninik akissarsiaqassaaq, siulittaasullu tullia 300.000 koruuninik akissarsiaqassalluni, siulersuisunilu ilaasortat allat 200.000 koruuninik akissarsiaqartinneqassallutik.

Air Greenlandimi, Royal Arctic Lineimi, Tele Greenlandimi, Inissiaatileqatigiiffik INI-mi aamma Greenland Holdingimi siulittaasut akissarsiaat ukiumut 350.000 koruuniussapput, siulittaasup tullii 175.000 koruuninik akissarsiaqassallutik siulersuisunilu ilaasortat 125.000 koruuninik akissarsiaqassallutik.

Piginneqatigiiffinni Nuna Oilimi, Greenland Oil Spillimi, Visit Greenlandimi aamma Nunatta Ammeriviani siulittaasut ukiumut 150.000 koruuninik akissarsiaqassapput, siulittaasup tullii 75.000 koruuninik akissarsiaqassallutik siulersuisunilu ilaasortat ukiumut 50.000 koruunisiaqassallutik.

Siusinnerusukkut akissarsiaritinneqartartut suliffeqarfiit kaaviiaartitaat naapertorlugit annertussusilerneqartarsimapput, siulittaasoq 100.000-it 400.000-illu akornanni akissarsiaqartinneqarluni, siulittaasup tullia 50.000-init 300.000-inut ilaasortallu nalinginnaasut 50.000-inik.

Siulersuisuni ilaasortat ilinniarsimasuunissaannik Naalakkersuisut kissaateqarnerisa malitsigisaanik akissarsiaqartitsisarnermut nutaamik politikkiliortoqarpoq. Peqatigisaanik siulersuisuni ilaasortat piginnaasaat sulisinnaassusaallu pillugit suli annertunerusumik piumasaqaateqartoqarpoq.