Kalaallit Nunaata Radioa ullumi siulersuisortaarpoq.
KNR-mi sulisut siulersuisuunerni sinniisissamittut toqqarpaat Peter Lynge, taassumali sinniisussatut sulisunit toqqagaanera Naalakkersuisunit atortussaatinneqanngilaq.
Naalakkersuisut Peter Lyngemut taarsiullugu toqqarpaat Mariia Simonsen, taama toqqaanermut tunngavigineqarluni siulersuisuni arnat angutillu amerlaqatigiinnissaat.
Naalakkersuisut taama aalajangernerat KNR-imi sulisunit assut naammagineqanngilaq, tamannalu pillugu KNR-imi sulisut sulinerminnut atatillugu ullumi ataatsimiipput.
Ataatsimieeqatigiinnerup kingorna Ilinniartitaanermut Kulturimullu Pisortaqarfik KIIIP allagaqarfigineqarpoq erseqqissaatigineqarluni sulisut Peter Lyngemik sinniisoqarusullutik toqqaanerat ataqqineqartariaqartoq.
KIIP-ip allagaqarnermut kingusinnerpaamik ataasinngorpat ulloqeqqanut akissuteqarnissaa naatsorsuutigineqarpoq.
KNR-imi sulisut sulinertik tallimat missaanni nangeqqippaat, tamannalu pissutigalugu unnumanna radioaavisi kiisalu Qanorooq tassa pisarnermit naannerussapput.