Siulersuisunik taarseraanerit upernaaq manna kingullersaat
Suliffeqarfik Namminersorlutik Oqartussanit pigineqartoq, Great Greenland, tusagassiortunik ullumi katersortitsivoq. Aleqa Hammond suliffeqarfiup taassuma siulersuisunik aamma taarseraavoq.
Allattoq Jonas Løvschall-Wedel, Simon Uldum
juunip 26-at 2014 03:18
Naalakkersuisut siulittaasuata Aleqa Hammondip, siulersuisuni allanngorartoqarnerata pitsaasuunera qangali erseqqissaatigereerpaa, tamannali suliffeqarfinni Namminersorlutik Oqartussanit pigineqartuni siulersuisuni ataqatigiissutsimut Namminersorlutik Oqartussat najoqqutassiaannik qalliineruvoq.
Great Greenlandimi siulersuisunut ilaasortanit sisamaasunit pingasut taarserneqarput. Siulersuisut siulittaasuat, Bruno Olesen, siulersuisut siulittaasuattut ingerlaannarpoq.
Taarserneqartut tassaapput Nauja Bianco, Mike Nicolaisen aamma Karen Simonsen, siulersuisnullu ilaasortanngortut tassaallutik Dorthea Rødgaard, Erik Sivertsen aamma Annette Kreiner.
Suliffeqarfik 2013-imi 5,9 millionit koruuninik sinneqartooruteqarfiuvoq. Sinneqartoorutilli taakku nangaanartoqartupilussuussupput. Eqqartuussivimmummi suliakkiissutigineqartumut atatillugu isertitariniakkat sinneqartoorutinut ilanngunneqarsimapput. Aningaasat tigussaanngitsut aningaaserivimmiitinneqanngitsullu.
Great Greenland suleqatigisimasani North Atlantic Fur Group ApS eqqartuussivimmut suliassanngortissimavaa, Great Greenland 32 millionit koruuninik tassannga piumasaqaateqarluni.
Aningaasat piumasaqaatigineqartut ukiumoortumik nalunaarummut ilanngunneqarsimanngitsuuppata, Great Greenland 26,6 millionit koruuninik amigartooruteqarfiusimassagaluarpoq.
Great Greenlandip Radioaviismut oqaatigaa, taakku 32 mililonikt pissarsiarineqanngippata tamanna nioqqutinik pigineqartut nalikilliliisoqartariaqarneranik kinguneqassasoq.
- Taamaammat Naalakkersuisut Great Greenlandillu angusat naammaginartutut isiginnngilaat, Naalakkersuisut taama allapput.
