Siulersuisuni taarsersuineq isornartorsiorneqarpoq
Arnat angutillu siulersuisuni amerlassutsimikkut naligiinnerulernissaat pingaarnerutikkaanni, inuiaqatigiit aningaasarsiornerat ataatsimut isigalugu eqqorneqarsinnaasoq, isornartorsiuisut aviisimut Jyllands-Postenimut ilaatigut oqarput:
- Suliffeqarfiupput, Kalaallit Nunaata aningaasarsiorneranut pingaarutilerujussuit, lektori Lise Lyck, CBS-imi immikkoortortami pisortaq, Jyllands-Postenimut oqarpoq.
Kalaallit Nunaata siunissami uuliasiorsinnaanissamut aatsitassarsiorsinnaanissamiullu nunanit allanit ukiuni makkunani aningaasaliisussarsiornera, taassuma eqqaasitsissutigaa:
- Namminersorlutik Oqartussani siulersuisuni ilaasortat allanngortiteraanni, inuiaqatigiit aningaasarsiornerannik eqquisoqarsinnaavoq, tamannalu ulorianarsinnaavoq - pingaartumik ukiuni makkunani, Lise Lyck oqarpoq.
Taanna Aarhus Universitetimi lektorimit, oqaluttuarisaanermillu ilisimatusarsimasumit Michael Bössimit tapersersorneqarpoq. Taassuma Kalaallit Nunaat immikkut aamma sammisarivaa:
- Siulersuisuni ilaasortat nuimanerit ilaat taarsersorneqarnerat inuiaqatigiinni ilaatigut aalassassutigineqarsimavoq, Michael Böss, Jyllnads-postenimut oqarpoq.
Siulersuisuni ilaasortat ilaatigut misilittagakittuunerat isornartorsiuisut tikkuartortarsimagaat, taassuma maluginiarsimavaa. Arnat ilaasortanngortut ilaat, angutillumi aamma, siulersuisuni suliaqarnermik misilittagakittuunerat, Michael Bössip aamma tikkuartorpaa.