Siulersuisuni siulittaasoq marloqiusamik inissisimariaannaq

Amalie Jessen Nunatta Ammeriviata siulersuisuini siulittaasussatut Naalakkersuisut qanittukkut toqqarpaat. Peqatigisaanilli naalakkersuisoqarfiup piniarnermut aallaaniarnermullu immikkoortuani allaffimmi pisortaalluni, tassalu Nunatta Ammerivianut aningaasaliissuteqarnissamik piareersaaneq sunniuteqarfigisinnaallugu. Taamaattorli marloqiusamik inissisimasinnaanini ajornartorsiutitut isiginngilaa:

- Aningaasaliisinnaanermut tunngasunik oqartussaaffeqanngilanga. Aamma suliffimma taanna eqqumaffigeqaa, tassalu suliassat immikkoortinneqarsinnaapput.

Kia suliassani pisunilu ataasiakkaani aalajangertassavaa, ajornartorsiutitaqanngitsoq?

- Pisortama. Kisianni tassa suliassat immikoortitersinnaavagut.

Amalie Jessenip pisortaraa, Naalakkersuisoqarfimmi pisortaq Jens K. Lyberth. Kisianni aamma allaffimmi pisortaagallartup marloqiusamik inissisimaleriataarsinnaanera Jens K. Lyberthip ilimaginngilaa:

- Marloqiusamik inissisimalersinnaanermut tunngasunik Naminersorlutik Oqartussat malittarisassaqarput, taakkualu malippagut. Ajornartorsiuteqalinnginnissaa uanga qulakkiissavara, Jens K. Lyberth KNR-imut oqarpoq.

Amalie Jessenip Nunatta Ammeriviata siulersuisuini siulittaasunngornissaa Naalakkersuisut aalajangigaraat. Naalakkersuisunut ilaasortaq Ane Hansen ima oqarpoq:

- Kinaluunniit peqqutissaqarsoriguni apeqqusiisinnaavoq, taava misissuisoqassaaq. Peqqutissaqarpallu aamma isummerfigineqarumaarpoq.