Siulersuisuni nunaqavissut amerlanerussuteqarnissaat siunnersuutigigaa
Namminersorlutik Oqartussat suliffeqarfiutaanni siulersuisut Nunatsinni najugaqavissut amerlanerussuteqartarnissaannik, Naalakkersuisut inatsisissamik siunnersuusiornissamut peqquneqarnissaannik, Suka K. Frederiksenip siunnersuutigaa.
- Pingaaruteqarsoraara nuna siulersuisuuffiginiagaq tassaasariaqartoq ulluinnarni qanimut inooqataanikkut ilisimaqarfigisariaqartoq, Suka K. Frederiksen siunnersuutimi tunngavilersuutaani allappoq.
Namminersorlutik Oqartussat suliffeqarfiutaanni siulersuisunut ilaasortat nunani allani najugaqartut amerlavallaartut, taanna isumaqarpoq. Naalakkersuisulli allamik isumaqarput.
- Siulersuisunik katiterinermi inuiaassuseq kisiat aallaaviginagu piginnaasalli assigiinngisitaartuunerlu aallaavigalugit katiterisoqartarpoq, Naalakkersuisut akissuteqaatiminni allapput.
Akissuteqaat naapertorlugu siulersuisunut ilaasortat 60 procentii Nunatsinni najugaqarput, 25 procentii Danmarkimi najugaqarlutik sinnerilu nunani avannarlerni, Tuluit Nunaanni Tysklandimilu najugaqarlutik.
Suka K. Frederiksenip Royal Greenlandip siulersuisuisa amerlanerit Nunatsinni najugaqannginneri isornartorsiorpaa.
Tamannali nassuiaatissaqartoq Naalakkersuisut allapput.
- Royal Greenlandimi nikingassummut nassuiaataavoq, nunani tamalaani ingerlatseqatigiiffimmi siammasissumik aalisakkanik inuussutissanillu tunisassiornermik misilittagaqarluartut piginnaasaqarluartullu siulersuisuniitsinnissaat pisariaqartinneqarput, Naalakkersuisut akissuteqaamminni allapput.