Siulersuisuni ilaasortaq taarserpoq

Kalaallit Nunaata Radioani sulisut siulersuisuni ilaasortaatitaat sinniisussaalu taarserput, taamaalilluni sulisut toqqagaat Peter Lynge siulersuisunut ilaasortanngorpoq.

Sapaatip-akunnerani kingullermi siulersuisunik ivertitsinermi KNR-imi sulisut siulersuisunut ilaasortassamittut pingaarnertut inassuteqaataat malinnagu Naalakkersuisut allamik toqqaagaluarput, KNR-imi sulisut akornanni eqqissiviilliortitsisumik.

Kultureqarnermulli Pisortaqarfik tusagassiutitigut ippassaq unnukkut nalunaarpoq, Naalakkersuisut toqqagaraluat, taassumalu sinniisussaa siulersuisunut toqqarneqarnerminnik akuersaarsimanngimmata naalakkersuisut ilaasortassamik nutaamik sinniisussaanillu toqqaasariaqarsimasut.

KNR-imi sulisut sinniisussamittut inassuteqaataat Peter Lynge taamaalilluni siulersuisunut ilaasortanngortinneqarpoq, Mariia Simonsen sinniisussaralugu.

Siulersuisunngortut sinneri tassaapput: siulittaasoq Juaaka Lyberth, siulersuisuni ilaasortat: Lisbeth Søvndahl Pedersen, Rigmor Thårup Høegh, Sofia Geisler, Svend Møller aamma Mikisoq Hove Lynge.