Siulersuisuisuusimasut: Akisussaassuseqarluta sulivugut

Puisi A/S pillugu eqqartuussivilersuussinermi suliassanngortinneqartut tamarmik nassuiaareerput, ilisimannittullu oqaloreerlutik.

Maannalu Puisi A/S-ip akiliisinnaajunnarneranik suliarinnittut sinnerlugit Namminersorlutik Oqartussat suliassanngortitsinerat tikinneqarpoq.

Siulersuisuusarsimasut, pisortaq kukkunersiusullu akisussaassuseqanngitsumik pissusilersorsimanerarlugit namminersorlutik Oqartussanit suliassanngortinneqarput. Kisianni suliassanngortinneqartunut eqqartuussissuserisut ilaat naapertorlugu suliaq taanna aamma ajornakusuussaqaaq.

- Suliami saqqummiunneqartut tunngavigalugit maanna isumaqarpunga, akisussaassuseqartumik iliuuseqanngitsoorsimanermik sumilluunniit takussutissaqanngitsoq. Pissutsit ilungersunarluinnartutut siulersuisuni isigineqarsimapput, tamakkualu aallaavigalugit iliuuseqarsimapput, Nicholas Symes oqarpoq. Taanna siulersuisunut ilaasortaasimasunut sisamanut eqqartuussissuserisuuvoq.

Taassuma eqqartuussissuserisullu allat arfineq-marluk suliassanngortinneqartut sinniissuuffitik sutigut tamatigut oqaluttuartinniarpaat, pisunik tamanik naammattumik nakkutiginnissinnaasimannginnerannik aammali akisussaassuseqartumik pissusilersorsimanerannik.

Ilisimannittutullu apersorneqartut akissutaat immakkajupput: "Naamik, tamatuminnga ilisimatinneqanngilagut". Imaluunniit: "Kisitsisit tassunga tunngasut arlaleriarluta piumagaluarpavut".

- Isumaqavippunga, piginneqatigiiffik ingerlalersinniarlugu siulersuisut assorsuaq sulisimasut, Jess G. Berthelsen nassuiaavoq.

Taanna suliassanngortinneqartunut ilaavoq, SIK sinnerlugu siulersuisuni ilaasortaasimagami, tassami SIK-ip suliffissaqartitsiniarnermut aningaasaateqarfia, Puisi A/S-imut aningaasaliisorpassuarnut ilaavoq.

Morten Tousgaard Royal Greenland sinnerlugu siulersuisuni 1999-imi juunimiit decembarimut ilaasortaavoq. Suliami eqqartuussivimmi suliarineqartumi tassani aamma suliassanngortinneqarpoq.

Kisianni tassunga tunngasoq, Danmarkimi Vestre Landsretsimi suliarineqassaaq, aatsaalli tamanna pissalluni Nunatta Eqqartuussiviani suliaq aalajangiiffigineqareeriarpat.

- Pisortaq missingersuutinik paasissutissanillu qinnuigiuaraluarparput, tamakkuali pitsaasuunngisaannarput. Kingumut qiviarluni silatusaarnissaq ajornanngikkaluartoq, isumaqarpunga paasissutissat pigisavut tunngavigalugut iliuuserisarisaqakkavut iliuuserigivut. Aamma isumaqarpunga siulersuisutut akisussaassusilimmik pissusilersortugut, isumarput malillugu piginneqatigiiffimmi nukittorsartariaqartut nukittorsarniartuarnerisigut, Morten Tousgaard eqqartuussivimmi nassuiaavoq.

Nicholas Symes nassuiaavoq, siulersuisut sunik iliuuseqarsimanerannik:

- Kukkunersiuisoq aggersarneqarsimavoq. Eqqartuussissuserisoq aggersarneqarsimavoq. Pisortaqarfik marlussoriarlugu nukittorsarneqarsimavoq. Siulersuisut nukittorsarneqarsimapput, Nicholas Symes oqaluttuarpoq.

Tassani pineqarpoq Ole Ramlau-Hansen, Royal Greenlandimi taamani pisortaanerusoq. Siulersuisuni siulittaasup Royal Greenlandimilu pisortaanermut tullersortaasup, Lars-Emil Johansenip, kaammattuineratigut Ole Ramlau-Hansen siulersuisunut ilungersoqisunut juullinngilaartoq ilaasortanngorpoq.

Ole Ramlau-Hansenillu nassuiaanermini siulersuisut sakkortuumik illersorpai:

- Siulersuisut atuutileramik ilisimanngisaannik taamani ilisimasaqarpunga, taamaammat apeqqutitsialassuarnik apeqquteqarsinnaavunga. Tassami siulersuisunut ilaasortannginngikkallarama, siulersuisut qanoq isumakulutsigisut malinnaaffigaakka.

Ole Ramlau-Hansenip iliuusia pingaarutilik siulleq tassaavoq Kinamut angalatitsineq. Kukkunersiuisut marluk Morten Tousgaardilu, siulersuisuni taamani ilaasortaajunnaareerluni allaffissornermik suliaqarnerulersimasoq, takusaapput.

- Siunnersuutigaara, ingilluta ilisimasaqarfiginngisatsinnik oqalukkunnaarluta, Kinaliartitsissasugut. Tassami piviusunik sunilluunniit ilisimasaqanngilagut, Ole Ramlau-Hansen oqarpoq.

Tamannarpiarlu Namminersorlutik Oqartussat eqqartuussissuserisuata isornartorsiugaraa:

- Sooruna siulersuisut siusinnerusukkut paasisimanngikkaat, sinnattut Kinamut tunngasut piviusumik tunngaveqanngitsut? Tunisassiorfeqanngilaq, akuersissutit pisariaqartut amigaataapput, kiisalu puisip orsuata qanoq pissarsissutigineqarsinaaneranik Kinamiittup David Stevensip pisortallu H.P. Barlach Christensenip Nunatsinniittup ilimagisaat assigiinngeqaat.

Aamma eqqartuussivimmi erserpoq, siulersuisut pisortaq Kinamut attaveqaatitut naatsorsuutigisimagaluaraat, kisianni illuanik aamma erserpoq, pisortaq suliaminik naammassinnissinnaasutut naatsorsuutigiunnaariartoraat.

Aamma siulersuisunut ilaasortat assigiimmik oqarput, Aningaasarpassuit Kinamut nassiunneqarnerat akuersissutigisimanagu.

Aningaasat Kinamut ilaatigut maskiinasissutissatut nassiussat, katillugit 6 millioni koruunerluinnaapput.

Puisi A/S-ilu pillugu eqqartuussivilersuussinermi piumasaqaatit 11 millioni koruunit missaaniipput, ilaatigut aningaasanik Kinamut nassiussinikkut siulersuisut akisussaassuseqannginnerangaammata, aammalu isumaqartoqarluni, Puisi A/S siusinnerusukkut akiliisinnaajunnartinneqarsimasariaqaraluartoq.

HP Barlach Christensenip eqqartuuississuserisua, Phillip Comerford, aamma Namminersorlutik Oqartussat eqqartuussissuserisuat, Jesper Müller, eqqartuussisoq isummertinnagu oqaaseqarumanngillat.