"Siuarsarta" Labradorimi ingerlanneqarpoq

Labradorimi iloqarfimmi Nain-imi oqaatsit pillugit ataatsimeersuarneq kalaallisut taaneqarsinnaasoq ”Siuarsarta” ingerlanneqarpoq.
juulip 11-at 2008 10:53

Nain-imi kulturileriffimmi, Torngasok-mi Labradorimeersunik oqaatsit pillugit, sapaatip akunnerani qaangiuttumi ataatsimeersuartoqarpoq, naggueqatigiit Inuit inuusuttaasa marluinnik oqaaseqalernissaat anguniarlugu oqaatsinik ilinniartitsinerup qanoq aaqqissuunneqarsinnaanera oqallisigineqarluni. Nunatsivut-miit, Nunavik-miit, Nunavut-miit allaninngaanneertunillu 80-init ataatsimeersuarneq peqataaffigineqarpoq. Labradorimi ingammik inuusuttut akornanni inuktitut oqaatsit atorneqarunnaariartuinnarmata qanoq uummarissaqqinneqarsinnaanerisa aqqutissiuunneqarnissaat siunertaavoq. Tamanna Nunatsiavut-mi præsidentip, Jim Lyall-ip inuiaqatigiinni inuktitut oqaatsit atugaanerulernissaat pingaaruteqarluinnartutut isigigamiuk iliuuseqarfigerusuppaa.

-Kulturitta attatiinnarnissaanut oqaatsitta inuusuttunit atorneqarsinnaanissaat pingaaruteqarluinnarpoq, Jim Lyall oqarpoq.

Siumut ukiuni 50-ini inuktitut oqaatsit uummarissartuarnissaat, soorlu atuarfinni ilinniutigineqarnissaat, Nunatsiavut-mi naalakkersuisut pilersaarusioreernikuuaat. Nunatiavut-mi kulturi pillugu naalakkersuisoq, Ben Ponniuk oqarpoq inuusuttut inuktitut oqallorinnerulernissaat, taamaalillutillu kulturiminnut tunngasunik ilisimasaqarnerulernissaat anguniarlugu ataatsimeersuarneq aallartisaataammat nuannaarluni persuarsiornissamut periarfissaasoq.

Ataatsimeersuarneq inuktitut taaguuteqarpoq ”SIVUPPIALAUTA”.