Siuaasavut nukittuut pillugit aasaanerani saqqummersitsineq

Siuaasatta nukittuut nersorlugillu saqqumilaartinnissaat saqqummersitsinermut pissutaasoq, qalipaasup saqqummersitsisup Maliinannguaq Marcussen Mølgaardip, saqqummersitsinermut pissutaasut nassuiaatigaa.

- Isumaqarama tamanna ullumikkut pisariaqartikkipput. Tusartuaannarparput sunut tamanut rekordiliisugut, kinguaassiutitigut atornerluinermut, imminut toquttarnernut, allarpassuarnullu. Tamanna illuatungilerniarlugu isumaqarpunga siuaasatta nukittuut, sapiitsullu ukiorpassuarnilu issittorsuarmi inuusinnaasimasut saqqumilaartinnissaat pingaaruteqartoq, Maliinannguaq Marcussen Mølgaard oqarpoq.

- Ilisimasassarsiortut siuttui tusarfigigaangatsigit, siuttui kisiisa tusarfigisarpavut, soorlu Peary, Knud Rasmussen, Mylius-Erichsen il.il. Annertunerusumillu tusarfigineq ajorpagut, ilisimasassarsiornerit iluatsittarnerinut patsisaanerpaasarttut, tassalu kalaallit piniartorsuit, ilisimasassarsiortut nerisassaannik, atortussaannillu isumaginnittut, aqqutissanillu ilitsersuisut, kiisalu arnat amernik issittumut akiuussinnaasumik oqortussanik suliaqallaqqissut, Maliinannguaq Marcussen Mølgaard oqarpoq.

Saqqummersitsineq "Angutit issittorlu" Katuami aggustip ulluisa 30-ata tungaanut takuniarneqarsinnaavoq.