Sisorartartut: Majuartaat naammassippat aatsaat upperilissuarput

Kommune Qeqertalimmi Kommunalbestyrelsep Qeqertarsuarmi sisorartartut majuartaatissaannut aningaasaleeqqinnera, Qeqertarsuarmi sisorartartut peqatigiiffianni siulittaasup, Kale Mølgaardip nuannaajallaatigaa.

Majuartaat ukiorpanni suliarineqarmat, naammassippat aatsaat siulittaasup upperilissavaa.

- Soorunami toqqissiallannarpoq, aamma una suliaq piariingajareeqqasoq uninngatiinnarneqapajaalernikoq ataartartuusugut sisorartartuusugut isumalluarfigaarput kiisami naammassineqarnialerunarmat. Kisianni naammassippat aatsaat upperilissuarput, DSP-mi siulittaasoq, Kale Mølgaard oqarpoq.

AAMMA ATUARUK Qeqertarsuarmi majuartaatissaq aningaasaliiffigineqaqqittoq

Kommune Qeqertalimmi qinikkat majuartaatip naammassinissaa siunertaralugu 2 millionit koruuninik aappaagumut aningaasaliipput. Suliaq Qaasuitsup Kommunerisimasaani 2016-imi 600.000 koruuninik akeqartussaatut missingersugaavoq.

Aningaasalli naammanngillat. Suliarmi 18-riaammik, tassa 11 millionit koruuninik aningaasartuutaareertoq, suli naammassineqanngitsoq 2019-imi maannaanaq unitsinneqarpoq.

Aningaasaliissutillu maanna katillugit 13 millioninngorput, majuartaallu suli inunnik majuussisinnaanani.

Majuartaammik atornikumik pisinermiit ingerlasinnaasunngorneranut qanoq suliarineqarnissaa najoqqutassiorneqarani aningaasaliinnarneqartarsimanera taamarujuk aningaasartornartoq, Kommune Qeqertalimmi Inuit Ataqatigiit sinnerlugit qinigaq, ataatsimiititaliamilu Timi Tarnilumi siulittaasoq oqarpoq.

- Pissutaanerpaasoq uaniippoq majuartaat suliarineqalernikuugami suliap naammassinissaanut pilersaaruteqarani, Karl Thue Nathanielsen oqarpoq.

Portusuumiittoq

Sisorartartut majuartaatissaat, Qeqertarsuup qaqqaani 700 meterit missaannik portussusilimmiippoq. Taanna peqatigiiffimmit 50-it missaannik ilaasortalimmit pisariaqartinneqarpoq. Taannami ingerlanngippat pissartanngorniuutitsisinnaanngillat.

- Majuartaat pisariaqarluinnarpoq ullutsinnut naleqquttumik ingerlalissagutta, aamma nuna tamakkerlugu pissartanngorniuunnernut pisariaqarluinnarpoq. Majuartaallu atulersimanngippat maani nuna tamakkerlugu pissartanngorniuunnerit ingerlassinnaajunnaarnikuuagut, Diskomi Sisorartartut Peqatigiiffianni siulittaasoq, Kale Mølgaard oqarpoq.

Taakkua ilaasortatik sisorartikkumallugit qamuteralannik qatsissumut maanna majuussuisaqattartarput.