Timersorneq

AWG2016 Sisorarfiit silap allanngornissaa neriuutigaat

Qaammat ataaseq qaangiuppat Issittormiut Unammiuaarnerat Arctic Winter Games aallartissaaq. Issittormiulli Unammiuaarnissaannut pingaaruteqarnerpaarpaaq aput amigaataavoq.

Allattoq Jaaku Lyberth

februaarip 08-at 2016 10:48

Nuummi Sisorarfiit – Skiliftenimit, nassuerutigineqarpoq, sisoraatinik unammiffiusussap aputeqarniarnera ilungersunartorsiorfiusoq.

- Sisoraatinik unammiffiususami ullut tamaasa aputilersuisarpugut tamannali iluaqutaavallaanngilaq tamannalu ajorluinnarpoq, Sisorarfiit - Skiliften qarasaasiakkut attaveqatigiittarfimmi Facebookimi nittartakkaminni taama allapput.

- Sisoraatinik sukkaniuffiusussami, ooqattaarffiusussami taamatullu sangusaarnermik unammiffiusussaq kiisalu snowboarderfiussaq taakkua aputilersornissaannut piffissaq kingulleq qaangereerparput.

Aamma atuaruk AWG2016 aputissaaleqivoq

- Maannakkorluinnaq aputeqarpianngilaq, taamaallaat neriuutigiinnarsinnaavarput sapaatit akunnerini tulliuttuni sila allangorumaartoq aputeqarlualerlunilu, Sisorarfiit – Skiliften Facebookikkut allapput.

Issittormiut unammiuaarnissaannut, Arctic Winter Gamesimut, aaqqissuisut aputeqassanngikkaluarpat piareersimatitaqarput.

Aputinik illoqarfimmit unammiffiusussamut ullut tamaasa aputilersuisarput, taassumalu saniatigut maskinanik aputilersuutinik marlunik piareersimatitaqartoqarpoq tassalu Issittormiut Unammiuaarneranni aputeqassanngikkaluarpat aput pisariaqartinneqartoq pissarsiarineqarsinnaassalluni.