Sisoraaserluni oqilaniunnermut illerngit piareersalerpaat
Salloqittaavissiorluni sisoraaserluni GM apriilip aallaqqaataani aallartissaaq – namminersorlutik oqartussat 50-nit amerlanerussumik peqataasoqarluni unammersuartitsinissamut akuersissappata.
Unammersuarnernik ASP Aasianneersoq aaqqissuisuussaaq. Namminersorlutilli oqartussaniit akuersissutit pissarsiariniarnerat sisoraaserluni oqilaniunnermut ataatsimiititaliap isumagisassarivaa.
- Aasianni GM-rtoqarnissaanut akuersissummik qinnuteqaat tunniutereerparput. Suliassaq tulliuttoq tassaavoq unammersuarnermi sinaakkutit ilaasortatsinnut ilisimatitsissutiginissaat, sisoraaserluni oqilaniunnermut ataatsimiititaliami siulittaasup tullia Majaq Heilmann KNR-mut oqarpoq.
AAMMA ATUARUK Martin Møller VM-mi unammeqataaqqaarmermini normu 3-nngorpoq
Nuna tamakkerlugu aaqqissuussat pillugit Naalakkersuisut ammaasseqqipput tamannali piumasaqaatitaqarpoq.
Peqataasut 50-nit amerlanerussappata nakorsaaneqarfik akuersiteqqaarlugu aaqqissuussisoqarsinnaavoq. Akuersissut taanna sisoraaserluni oqilaniunnermut ataatsimiititaliap utaqqiinnarpaa.
- Qangatut katersuussinnaanngilagut aamma qangatut nereqatigiissinnaanngilagut. Tamakkuupput naalakkersuisoqarfiup akisussaasup sinaakkusersugassai, Majaq Heilmann oqarpoq.
Immikkut malittarisassat
Sisoraaserluni oqilaniunnermi unamminerit assigiinngitsunik aallartinneqartarput.
Unamminerit ilaanni ataasiakkaarlutik sekundinik 30-nik akunneqarlutik aallartarput.
Unamminerit ilaanni ukioqatigiit ataatsikkut aallartinneqartarput.
AAMMA ATUARUK Coronamut malittarisassat qasukkarmata: Volleyball GM-mut piareerpoq
Ataatsikkullu aallartarneq qanillinaversaarnissamik pisortat inassuteqaataannut naapertuukkunnaarsinnaavoq.
- Ilimanarsinnaalluarpoq ataatsikkut aallarnermi unammeqataasut aalajangersimasumik ungasissuseqarnissaannut piumasaqartoqarsinnaanera. Takoriartiguli namminersorlutik oqartussat qanoq ittunik sinaakkusiiumaarnersut, Majaq Heilmann oqarpoq.
Taassuma ilanngullugu oqaatigaa GM-rtoqarnissaanik nalunaartoqarnera qiimmaallaataalereersoq. Sungiusariartartut amerlipput sungiusarnermilu sukataarneq malunnarseqqilluni.