Sisimiut umiarsualiviata ilaneqarnera ullumi nalliussineqarpoq

Sisimiuni ualeru nalliuttorsiualaartoqassaaq. Qeqqata Kommuniani borgmesterip Hermann Berthelsenip, illoqarfiup umiarsualiviata allissutaa ualeru pingasut qaangilaarneranni atoqqaartissavaa. Sisimiut taamaalillutik takornariat umiarsuaannut, aalisarnermut aamma uuliamik ujaasillutik misissuisussanut aqqusaartorneqarlualissaaq.
Allattoq Jaaku Lyberth
juunip 20-at 2013 09:36

 

Ullaaq manna nalunaaqutaq arfineq pingasunut takornarianik angallassissut Sea Explorer umiarsualivittaamut talippoq

 

Hermann Berthelsenip ammaanersiornissaq qilanaaraa:

 

- Ulloq pingaaruteqaqaaq, Sisimiunuinnaanngitsoq kommunili tamakkerlugu pingaaruteqarluni, taanna oqarpoq.

 

Tassami aamma kommunimi innuttaasut tamarmik umiarsualiviup allissutaa akileeqataaffigaat.

 

Allissutaatami akia 56,6 millionit koruuniusoq, kommunimi akileraarutip 2011-mi procentimik ataatsimik qaffanneratigut akilerneqarmat.

 

Taama aalajangerneq kommunimi illoqarfiup aappaani, Maniitsumi, taamani oqallisigineqaqaaq, ilaatigut Sisimiuni umiarsualiviup allinissaanut akileqaataanissartik paasiuminaatsikkamikku.

 

Mannali tassa umiarsualivik piareerpoq, ullullu tulliuttut arfineq pingasut ingerlanerini takornariat umiarsuaannit sisamanit taliffigineqartussaalluni.

 

Illoqarfimmi innuttaasut ualeru nalunaaqutaq 15.00 ammaanersiornermut tikilluaqqusaapput. Kaffeqarlunilu teeqassaaq, qaannamik takutitsisoqassalluni, qatserisartullu annaassiniarnermik takutitsissallutik nipilerortoqassallunilu.  

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq