Sisimiut tungaanut aqqusinniorneq juulimi aallartissinnaasoq
Sanaartornermik suliffeqarfiup MT Højgaardip Kangerlussuarmit Sisimiunut aqqut siulleq, 21 kilometeriusumik takissuseqartoq suliarissavaa.
Qeqqata Kommuniata MT Højgaardillu aqqusinniornissamut, juulimi aallartinneqartussamut ippassaq isumaqatigiissuteqarput. Kommuni tusagassiuutinut taama paasissutissiivoq.
Aqqusineq 21 kilometeriusoq Kangerlussuup umiarsualiavianit, Kellyvillemit Aasivissuarnut Tasersuarmullu ingerlaassaaq. Kommunip Kangerlussuarmit 21 kilometerit siulliit taassuma kingorna ATV-nut aqqut 100 kilometerit suliarinnittussarsiuuppai.
MT Højgaardimut isumaqatigiissuteqarneq Qeqqata Kommuniani borgmesterip, Malik Berthelseni nuannaarutigaa:
- Maannakkut aqqusinermik aallartitsivugut, nalornisiginngilluinnarparalu Kangerlussuup Sisimiullu akornanni nunatarujussuaq maannakkut tikinneqarsinnaanngornera, Qeqqata Kommunianut Kalaallit Nunaannullu annertuumik iluaqutaassasoq. Malik Berthelsen tusagassiuutinut nalunaarummi oqarpoq.
- Kangerlussuarmi innuttaasunut takornarianullu periarfissanik nutaanik tunisissaaq, aammalu aqqusineq Sisimiunut apissippat periarfissarpassuit allat takkutissapput, borgmesteri itisiliivoq.
Juulimi aallartinneqassasoq
Naalakkersuisut kommunip ASN-mut nassuiaataa sapaatip akunnerata siuliani akueraat.
ASN avatangiisinut sunniutinik naliliineruvoq. ASN-imi Kangerlussuup Kangerluarsup Tullerullu akornanni aqqusinniornermik suliaqarneq avatangiisinut qanoq sunniuteqarsinnaanersoq nassuiaatigineqarpoq, sunniinerlunnerillu qanoq iliuuseqarfigineqassanersut aamma nassuiaatigineqarluni.
AAMMA ATUARUK ASN akuerineqartoq: Kangerluarsuk Tullermut aqqut qanilliallattoq
MT Højgaardip aqquserngup aallartinnera 21 kilometeriusoq suliarisussanngoramiuk aamma nuannaarutigaa. Suliaqarnissaq qaammatip tulliata ingerlanerani aallartinneqartariaannaavoq.
- Kangerlussuup Sisimiullu akornanni aqqusinermik aallartisaaqataanissamut MT Højgaard qilanaarpoq. 21 km aallartisaataaginnarnissaat ilimanarpoq, kisianni MT Højgaard-imiit Sisimiunut aqqusineq tamaat peqataaffigissallugu piareersimavugut, MT Højgaardimit Sune Bastrup tusagassiuutinut nalunaarummi oqarpoq.
- Ukioq manna juulip naalernerani pisussatut naatsorsuussaasoq aallartisaanissaq maannakkut pilersaarusiuleruttorparput, nangilluni oqarpoq.
