Sisimiut nipilersornermik ilinniarfittaalerpoq

Sisimiut ukiaru septembarimi nipilersornermut ilinniarfittaassaaq. Sisimiuni nipilersornermut ilinniarfissami Nuummi nipilersornermik ilinniarfiup ilinniartitseriaasia, ukiuni arlaqalersuni meeqqanik inuusuttuaqqanillu iluatsilluartumik ilinniartitsiffiusoq assilineqassalluni.

Sisimiut Kommuniata ilinniarfiliornermut atatillugu ULO-p immiussisarfikua, siorna matusoq pisiarisimavaa.

ULO-p immissisarfikuani init immiussiviit nipimut ussissakkat kommunep ilinniartitsivissatut assut piukkullugit illu pisiarisimagaa, Sisimiut kommuneani atuarfeqarfiit pisortaa Lise Lennert oqarpoq.

Sisimiuni nipilersornermik ilinniarfissami ulluunerani ilinniartitsisoqartassaaq.

- Ullukkut ilinniartitsisoqareeraangat unnukkut peqatigiiffik nipilersornermik aallussaqartoq ”Nipesi” inuusuttullu avataanit maannga ilinniariarsimasut højskolertullu illumik atuinissamut aamma periarfissinneqarput, Lise Lennert oqarpoq.

Sisimiuni nipilersornermik ilinniarfissamut Sisimiut kommuneat 400.000 koruuninik ukiumut aningaasaliissuteqareerpoq, ilinniarfissarlu ullup affaani sulisartussamik pisortassarsiuunneqassaaq.

Sisimiuni sunngiffimmi sammisassaqartitsinermut pisortaq Agnes Johnsen oqarpoq Sisimiut illoqarfiata siunissami nipilersoqatigeeqalernissaa aamma pilersaarutaasoq.

-Meeqqat inuusuttuaqqallu arfinillit 19-illu akornanni ukiullit 1300-it siunertalimmik sammisassaaleqipput, kikkummi tamarmik timersornermut soqutiginnittuunngillat, taamaammat nipilersornermik ilinniarnissamik neqerooruteqarnissaq assut nuannaarutissaavoq, Agnes Johnsen oqarpoq.

Sisimiuni nipilersornermik ilinniarfissami nipilersuutit atugassat amerlanerit maanna aamma pissarsiarineqareersut, Agnes Johnsen oqarpoq.