Sisimiut kulturikkut illutaalerpoq
Sisimiut kulturikkut illutaarnissaa aalajangiunneqarpoq.
Sisimiut kommunalbestyrelsiata aningaasaqarnermut ataatsimiititaliaani ilaasortat akuersissutigaat ilassutitut aningaasaliissuteqarnissartik. Tamatuma kinguneranik kulturikkut illutaarnissamik pilersaarutit piviusunngorsinnaanngorput.
-Illu pilersaarutaareersimasunit anginerulaassaaq taavalu immikkut aningaasartuutissat tassaallutik teknikkikkut pitsanngorsaatinut matussutissat, Sisimiuni borgmesteri Hermann Berthelsen, suliap inerneranik naammagisimaarinnilluni unnersiorpoq.
Taassuma suleqatigiissitaq peqatigalugu ulluni kingullerni sanaartornissamut sipaarutissanik nassaarniarnini ulapputigaa. Sipaarutissat 1,2 mio kruuninik aningaasartallit nassaarineqarsimapput. Kommunalbestyrelsilu akuersissuteqariarpat sanaartorneq piaartumik aallartissinnaanngussaaq, sapaatip akunnerata tulliata naalernera tagginneqarluni.
Sanaartornissamut akuersissutip kinguaattoortitsinera pissutigalugu illutaassap aatsaat 2007-ip aallartilaarnerani naammassinissaa borgmester Hermann Berthelsenip neriuutiginerarpaa.
