Sisimiut: Kattussuunnissaq siusippallaarpoq

Kommunit kattussuunissaannut piffissaliussaq 2009 siusippallaarpoq. Namminersornerullutik Oqartussanit KANUKOKA-millu paasissutissiissutit naammanngillat, Sisimiut borgmesteriat Hermann Berthelsen oqarpoq.

- Kattussuunnissap suli oqallissutaanissaa pisariaqarluinnarpoq.

Sisimiut Maniitsullu suleqatigiissutissartik upernaaq atsioqatigiissutigaat.

- Sisimiut kommuneanut suleqatigiinissamik isumaqatigiissuterput suli ilalersorsinnaavarput, qaguguli naammaginartunngussanersoq oqaatigiuminaammat, qaqugu kattunnissarput oqaatigiumanaappoq, Søren Lyberth, Maniitsup borgmestria oqarpoq.

- Inatsisartut kaatussuunnissamut piffissaliussaat allanngortinneqassanngilaq, Naalakkersuisut siulittaasuat, Hans Enoksen oqarpoq.

Siumut siulersuisui, Naalakkersuisuniititaat borgmesteriutitaallu sapaatip akunnerata naanerani ataatsimiipput, kommunit kattussuutinneqarnissaat eqqartorlugu.

Kattussuutsitsinissamut isumalioqatigiissitap innersuussutigaa nunatsinni kommunit sisamanngortinneqassasut.