Sisimiut illoqarfinni pingaarnersaassaaq
Qeqqani kommunerujussuassani, januaarip ulluisa aallaqqaataanni 2009-mi aallartittussami, Sisimiut tassaassaaq illoqarfik pingaarnersaq, tassa Sisimiut Maniitsullu kommunii kattuppata. Akileraarutissalli procentiat ataaseq Maniitsup ilutigalugu sipaassavaa.
Inuussutissarsiutit takorluukkallu pillugit Sisimiuni sapaatip akunnerata naanerani paasititsiniaasoqarmat tamanna ilaatigut isummiunneqarpoq, paasititsiniaanermi peqataapput Maniitsumi Sisimiunilu komunalbestyrelsit, atorfillit inuussutissarsiutillillu. Sermitsiaq nittartakkamini ullumi taama allappoq.
Kommunerujussuarmi borgmesteri qullersanngortussallu tamarmik Sisimiuni komunip allaffiani suliffeqassapput, Maniitsumili borgmesterip, Søren Lyberthip, Siumumeersup, tamanna ernumanartoqartinngilaa:
- Kommunip aaqqissuussaanerata malitsigissavaa, suliassat arlalissuit Namminersornerullutik Oqartussaniit kommuninut nuunneqarnissaat, taamaammat suliffinnut Sisimiunut nuunneqartunut taarsiullugu Maniitsumi suliffissat amerlissapput.
Maniitsoq illoqarfiit pingaarnersanngunngitsooraluarluni akileraarutissap procentia ataaseq sipaassavaa: Sisimiuni akileraarut ullumikkut 25 procentivoq Maniitsumilu 26 procentiulluni. Kommunerujussuanngorpata akileraarut 25 procentiussaaq.
