Sisimiut Friskole aallartiinnaqaaq

Sisimiut Friskole sisamanngormat kingullermi ammaanersiorpoq.
Allattoq Najaaraq Egede
aggustip 21-at 2008 16:56

Sisimiut Friskoliani siulersuisuni siulittaasoq Johan Meyer atuarfimmik ammaanernermut pissutaasut imatut nassuiarpai.

- Meeqqat atuarfii angisuukkajuttarput tamatumalu kingunerisaanik meeqqat isiginiarneqarnerat annikinnerulersinnaasarpoq. Sanilliullugu meeqqat friskolimi atuartut eqqummaariffigineqarnerussapput, tamannalu friskolitsinni nukittussutigivarput, Johan Meyer oqarpoq.

Sisimiut Friskoliat marlunnik ilinniartitsisoqartoq 25-inik atuartoqarpoq.

- Friskolep ilusaa nunaqarfimmi qangaanerusoq atuarfittut isiginiarneqarsinnaavoq. Klassit angivallaanngitsut, avatangiisit toqqissisimanartut, ilinniartitsisut angajoqqaallu pimoorussisut, meeqqallu alapernaatsut, Johan Meyer oqarpoq.

Sisimiut Friskoliani atuarneq meeqqamut ataatsimut qaammammut 2.300 koruuneqarpoq, atuarfimmi ulloq naallugu ullaakkut arfineq-pingasuniit ualikkut tallimat qeqqata tungaanut meeqqamik susassaqartitsinermut akiliutit.