Sisimiut eqqaanni ataasinngorpat nipisanniartoqarsinnaalissaaq
Sisimiut eqqaanni ataasinngorpamiit nipisanniartoqarsinnaalersoq Aalisarnermut, Piniarnermut Nunalerinermullu Naalakkersuisoqarfiup nalunaarutigaa.
Allattoq Mads Lynge
apriilip 14-at 2016 05:18
Aqutsiveqarfiugallartumi 1Bb-mik taaguuteqartumi nipisat suaannik suanniarneq ataasinngorpat apriilip ulluisa 18-ianni ammaanneqassasoq Naalakkersuisut nalunaarutigaat.
90 tonsit pisassiissutigineqarput, pisassiissutigineqartullu nunguppata, ullulluunniit aalisarfigineqartussat 47-t nallerneqalerpata nipisat suanniarneq unitsinneqassasoq nalunaarutigineqarpoq.
Aqutsiveqarfiugallartumi 1 Bb-mi nipisanik tunisineq ulloq kingulleq tassaasinnaavoq tallimanngorneq juunip ulluisa pingajuat, pisassiissutigineqartut ullormi tassani nungunneqarsimanngippata nipisat suanniarneq ulloq taanna unitsinneqarsinnaassalluni.
