Greenland Adventure Race ulluni tallimani ingerlanneqareersoq nunatsinniit peqataasut Sisimiut Boys, ukioq manna Greenland Adventure Race-mi ajugaasuupput.
Sisimiut Boys-imi arpaqataasut tassaapput Jørgen Leander Niels Berthelsen-ilu.
Ullumikkut unamminerit ulluisa tallimassaanni peqataasut Igalikumi qaqqarsuaq 1.752 meterisut portutigisoq Illerfissalik qaqivaat, Igalikumullu apuullutik.
Ajugaasut nalunaaquttap akunneri sisamat minutsit 41-it sekundillu qulit arpassimapput.
Danmarkimi Holstebromit unammeqataasut marluk normu 2-ngorlutillu normu 3-ngorput.
Arnani unammeqataasut nunatsinneersut tamarmik aqqutaani uniinnartariaqarsimapput, taavalu arnat angutillu akuleriinneranni peqataasutuat Qaqortumeersut Rita aamma Pakkiaraq Ottossen ajugaasussatut naatsorsuutigineqartut, ilanngutassiap suliarineqarnerani suli apuusimanngillat.