Sisimiut: Borgmesterip atuarnerup aallartinnera angajoqqaat ernumagaluartut illersorpaa
Ulloq atualeqqaarfik nalliuttorfiusaraluarpoq. Sisimiunili coronamik tuniluuttoqarnera pissutigalugu nuannannissaq killeqartinneqarpoq.
Sisimiuni tunillatsissimasorpassuaqarnera pissutigalugu atualernissaq sapaatip akunneranik kinguartinneqareerpoq, angajoqqaallu ernumasut isumaat naapertorlugu kinguartitseqqittoqartariaqaraluarpoq.
Tassunga 167-it atsiorsimapput.
- Atuarfimmi suli tuniluuttoqarsinnaanera ernumassutigaarput. Atuarfimmut isernissamut tunillatsissimannginnermut uppernarsaateqarnissaq piumasaqaataanngilaq, Oline Inuusuttoq Olsen KNR-imut ippassaq oqarpoq.
AAMMA ATUARUK Oline Sisimiuni atualertoqannginnissaanut atsiortitsigaluarpoq - Naja Katinkali 1.B-mi ullumi atualerpoq
Atuarfiilli matui ammarneqarput. Tamannalu illersorneqarsinnaalluartoq, Qeqqata Kommuniani borgmesteri, Malik Berthelsen (S) isumaqarpoq.
- Angajoqqaat ernumanerat paasisinnaavarput, kisianni nunatta nakorsaaneqarfiata taakua innersuussutigisai malinneqarpata, taava tassa neriuppugut siammaatsaaliineq suleqatigiilluta angusinnaagipput, borgmesteri oqarpoq.
Qanillinaveersaarneq errortukulanerlu
Borgmesterip atuartut 1. klassimiit 5. klassimut kisimik atuarfimmut sapaatip akunnerani matumani atuariarsinnaasut erseqqissaatigaa, atuartullu 6. klassimiit qummut angerlarsimaffimmiit atuartinneqassapput.
Meeqqat atuarfimmi tuniluuttoqannginnissaa pissutigalugu arlalinnik malittarisassanik malinnissapput.
Nakorsaaneqarfiup Qeqqata Kommunialu suleqatigiillutik atuartut imminnut qanillinaveersaarnissaannut tuniluuttoqarnissaanillu pinaveersaartitsinissamut malittarisassaliorput.
Malittarisassani pingaarnerit tassaaapput:
- 1.-5.klassit atuarfinni atuartinneqartassapput, 6.-10.klassillu angerlarsimaffimminniit atuartinneqartassallutik. Marlunngorpat 6.-10. klasse angerlarsimaffimminni atuartinneqarnissaannut ilitsersuutit nassiunneqassapput.
- Atuartut holdikkaarlutik atuariartortassapput. Taamaaliornermi atuartut atuartitsiviup iluaniittut ikilisarneqassapput.
- 1.-5. klasse ataasinngorpat 16. august atualissapput.
- 6.-10. klassit marlunngorpat 17. august atualissapput.
- Atuartut nikerartunik atuariartortarfeqarlunilu anitsiartarfeqassapput.
- Atuartut, inimi atuartitsivimmi ullup qeqqasiortassapput, tamatumani neriffiup nalaani atuartunut allanut akulerutinnginnissaq pinaveersaarniarlugu.
- Anitsiarfiit aalajangersimasumik aaqqinneqassapput, taamaalilluni atuartut atuaqatitik kisiisa anitsiaqatigisassallugit.
- Atuartut imminnut qanillinaveersaassapput, assatillu errortukulallugit
- Atuartut nualluummut ersiutillit angerlarsimaannassapput.
Anitsiartarfiit assigiinngitsuussapput, qanillinaveersaartoqassaaq assallu errortukulaneqassallutik.
- Pisut soorunami malinnaavigeqqissaarpagut, kisianni tassa nunatta nakorsaaneqarfiata nalilermagu ukua innersuussutigineqartut malinneqarpata, taava imminut illersorsinnaasumik atuartut aallartissinnaasut, Malik Berthelsen oqarpoq.
Pissutsit qanimut malinnaaffigigaat
Sisimiuni coronamik tunillatsissimasut nunatsinni maanna amerlanerpaapput.
Tunillatsissimasut maannakkut 73-iupput. Sisimiunilu tuniluuttoqarnerata unikaallatsinneqarnissaa pissutigalugu killilersuinerit sukannersut atuutsinneqarput.
Assersuutigalugu kommunip allaffianut neriniartarfimmulluunniit iserniaruit tamakkiisumik akiuussuserneqarsimanerit uppernarsarsinnaassavat imaluunniit tunillatsissimannginnermut uppernarsaat sivisunerpaamik akunnernik 48-nik pisoqaassuseqartoq takutissinnaasariaqarpat.
Malittarisassarli taanna atuarfinnut atuutinngilaq.
- Pissutsit nalilersorpagut pissutsillu qanimut malinnaaffigalugit. Taamaammat ullut aggersut qanoq inneri apeqqutaassapput. Tuniluuttoqangaatsiarnikuuvoq, tamannalu piffissami aggersumi annikillinissaa neriuutigaarput. Tamanna neriuutigilluinnarparput, Malik Berthelsen (S) oqarpoq.