Sisimiunut nuussinissaq SIKp taperserpaa
Siullermik Imarsiornermut Ilinniarfik Nuummut nuunneqartussanngorpoq. Taava Saviminilerinermik Ilinniarfiup Nuummiittup Sisimiunut inissinneqarnissaanut pilersaarusiortussamik ilinniartitaanermut naalakkersuisoq Palle Christiansen suleqatigiissitaliorniarpoq.
- Sanaartornermut Ilinniarfimmi sakkut aamma ilinniartitsisut ullumikkornit ajunnginnerusumik atorneqarsinnaanngussapput, ataatsimullu isigalugu ilinniartitaaneq pitsaanerulerniassammat, Jess G. Berthelsen oqarpoq.
Naalakkersuisunut ilaasortaq Palle Christiansen tusagassiutinut allappoq, Saviminilerinermik Ilinniarfiup Sisimiunut nuunneqarnissaani qanoq periuseqartoqarnissaanik suliaqartussanik suliaqatigiissitaliortoqassasoq.
Saviminilerinermut Ilinniarfiup Sisimiunut nuunneqarsinnaanera ilinniarfimmi tassani siulersuisut sukumiisumik suliamullu ilisimasaqarneq tunngavigalugu piffissami qaninnermi oqaluuserissagaat ilinniarfiup siulersuisuni siulittaasup Alex Nørskov-ip oqaatigaa, nutaarsiassarli annerusumik oqaluuseriumanagu.
Siulersuisunili ilaasortaqataa, SIK-ip siulittaasua Jess G Berthelsen tamatumunnga oqaaseqarumavoq, oqarlunilu Saviminilerinermik Ilinniarfik aamma Sanaartornermut Ilinniarfik ataatsimoortariaqartut, ilinniarfiillu sumiinnissaat apeqqutaatinnagu.
Saviminilerinermut Ilinniarfiup Nuummiittup Sisimiunut nuunneqarnissaa imaluunniit Sanaatornermut Ilinniarfiup Sisimiuniittup Nuummut nuunneqarnissaa Jess G. Berthelsen apeqqutaatinngilaa, taamaattorli kattuppata iluaqutissartaqartoq SIK-ip siulittaasua isumaqarpoq.
Ilinniartitsisut atorluarneqarsinnaanerat Jess G. Berthelsenip naatsorsuutigaa tamatumalu inuusuttunut ajunngitsumik sunniuteqarnissaa ilimagalugu.
Saviminilerinermik Ilinniarfiup Sisimiunut nuunneqarnissaanik eqqarsaatit pillugit , Ilinniartitaanermut Naalakkersuisoq Palle Christiansen radioaviisimit oqaloqatiginiaraluarparput, taannali sulinngiffeqarluni angalagami oqaaseqarumangilaq.
