Sisimiuniit feeriartut amiilaarnartumik misigisaqartunut ilaapput

Sisimiormiut Thailandimut feriartut immap eqqaani hoteleqarlutik qujanartumik quleriit pingajuanni najugaqarallartillutik nulia annappoq, ilaqutaalu neriniartarfimmi portunermiikkallarlutik annallutik.

Tom Pedersen kiisalu Nunngu Jensen meeqqatillu marluk aliannaarsaarlutik Thailandimi ulluni sisamani paradisimiittutullusooq misigisaqareerlutik amiilaarnarnerpaamik misigisaqarput.

Hotelli imaaniit 75 meterinit ungasitsigisumi inissisimasoq Tom Pedersenip Nunngu Jensenillu najugaqarfigisimavaat. Hoteli immap tungaanut qarmarsuarnik issusuunik marlunnik illersuuteqarsimavoq, mallilli qaarnerata siulliup qarmarsuit taakkua marluk sequmilluinnarsimavai. Hotelimilu allerpaami najugaqartut iniminniittut tamarmik qarsutsinermi ipisimasut, Nunngu Jensen oqarpoq.

Uia Tom Pedersen ima oqaluttuarpoq:

Nunngup assiliiviup digitalip imassaa hotelimi quleriit pingajuanniittumut aavaa, uagut hotelip nerisarfiani issiarusaartugut.

Qanngornersuit tusarsaapput innaallagiaarullunilu Nunngu eqqarsarsimavoq terroristinik hoteli saassunneqarsimassasoq.

Immaqa minutsit qulit missaat qaangiuttut paasilerparput hotelip neriniartarfiata inissisimaffiata betonimik sanaap avataa tamarmi immamik qalleqqasoq, meeqqallu nikeriarsinnaajunnaarlugit tigummivakka, Tom Pedersen oqarpoq nangillunilu.

Silattuaqilerluta illorsuup portunerpaartaanut majuarpugut. Tappikanngaaniillu takusinnavagut timit uumaneqanngitsut sumi tamaani puttasut. Tassa hotelip nalunnguartarfiani aatsaannguummat nalunnguartut timaat.

Meeqqat taama amiilaarnartigisunik takusaqartinnaveersaarlugit allamut saasarpakka, Tom Pedersen oqaluttuarpoq. Sisimiuniit aappariit meeqqatillu marluk arfineq-pingasunik 13-nillu ukiullit ilagalugit Thailandimi qeqertami Pucketimi feriartarfimmi Patungimi januaarip 4-ta tungaanut feriartussaagaluarput ullumili Århusimut apuullutik.

Nuliara utermat pingasoriarlunilu qarsutsereermat isumaqatigiippugut qaqqamut qimaaniarluta.

Ualikkut taarsiartulernissaata tungaanut qaqqami qimaasimaarpugut. Taarsippalli pulateriaarsuit ulorianaqisut avatangiiseriniannginnatsigit ualeq naasoq hotelimut uterpugut.

Hoteli sumilluunniit sulisoqanngilaq, tarrup ataani initsinnut aalleriarluta allamukarfissarsiorniarluta anivugut. Suli mallit ulissuartitsisartut takkuteqqinnissaat naatsorsuutigineqarsinnaasoq paasigatsigu aqqusinikkut illoqarfissuup tungaanut aallarpugut.

Qujanartumik biilinit ikineqaratta illoqarfissuarmut inissarsioriartorpugut, tikippugullu illoqarfimmiut suli qanoq pisoqarsimaneranik ilisimasaqarunanngitsut. Tom Pedersen annakkuummeqqaqisoq oqaluttuarpoq.

-Soorlu inunngoqqilluta periarfissinneqaqqiinnallarluta, Tom Pedersen oqarpoq.