Sisimiuniit aqqusinissaq akitsoraluttuinnarpoq
Sisimiuniit Kangerlussuup tungaanut aqqusinniornissaq 500 mio.kr.-nik akeqassaaq. Sisimiut Kommuneata Kangerlussuarmut aqquserniassaq pillugu nalunaarusiaanik sammisaqartup Namminersornerullutik Oqartussanit Sisimiullu kommuneanit suleqatigiilluni suleqatigiissitaliap taama naliliinera naalakkersuisunut tallimanngormat saqqummiunneqarpoq.
Suleqatigiissitaliaq isumaqarpoq Sisimiut Kommuneata akikitsumik, tassa 250 mio. kr.-it nalinginut taggissineranit Kangerlussuarmut aqquserniassaq marloriaammik, tassa 490 mio. kr.-nik akeqassasoq. Suleqatigiissitaliap taama naliliineranut siunissaq ungasinnerusoq isigalugu aqqusinniortoqarnissaa, taamaalillunilu aserfallatsaaliinermi aningaasartuutit annikinnerunissaat tunngaviusut, Attaveqarnermut pisortaqarfimmi immikkoortortami pisortaq Michael Pedersen ilisimatitsivoq.
Nuummi Ilulissanilu mittarfiit allilerneqarnerisigut Kangerlussuarmi suliat annikillileriffigineqarnissaat ilimagineqarsinnaammat aqqusinniornissamut qulaajaasoqaqqaarnissaa nalunaarusiami nutaami siunnersuutigineqarpoq.
