Sisimiuni uuliaarluerneq annertooq

Solarip 10.000 liiterip missaaniittup Sisimiut umiarsualiviani kuussimanera qatserisartut 21-t ippassaq unnukkut unnuallu ilaa ulapputigisimavaat.
aggustip 13-at 2008 17:14

Polaroil, Pilersuisuminngaanniit uuliamik orsiisartut, takornarnianut umiarsuaq FRAM orsersussallugu slangiminnik unitsitsineq ajulersimapput.

Sisimiuni qatserisartut ittuat, Steen Boassen, ima oqarpoq:

-Nammineerluni milittartuugaluaq ajutoorsimagami, taamaalilluni aniasoorjussuarluni, takananilu milinnaveerlugu, nangipporlu:

-Qatserisartut allatut ajornartumik tankeqarfimmut biilerlutik, umiarsualivimminngaaniit immaqa 1 -1½ kilometeri missaa ungasitsigisoq orneqqaarlugu ruujorip milittaataa milikkiartorlugu, aatsaat taamaasillugu unitsissimavaat, Steen Boassen oqarpoq.

Ilanngullugu oqaatigaa saleeqqissaassagaanni atortutigut pitsaasunik peqartariaqartoq. Sisimiuni qatserisartut 21-ullutik ippassaq unnukkut nalunaaqutaq arfineq pingasuniit unnuaq nalunaaqutaq pingasut tungaanut gummibådimik angallaserlutik saliisimapput, umiatsiaaqqamilli ikiorteqarsimallutik.

Steen Boassen aamma oqarpoq Sisimiut umiarsualiviat solarisunnilaartoq. Qatserisartut solari 10.000 liiterinit sinneqassangatinneqartoq kuussimagaluartoq, 3.000 liiterip missaa immamit milluartissimavaat. Uuliali seqinermit aalarluni nungukkiartortarmat mingutsitsineq qanoq annertutiginersoq oqaatigisinnaannginnerarpaa.