Sisimiuni utoqqaat angerlarsimaffiani coronavirusertorpassuusut
Sisimiuni utoqqaat angerlarsimaffiani coronavirusi tuniluutipilooraluartoq atupilunneqanngitsoq angerlarsimaffiup pisortaa oqarpoq.
Utoqqaat Angerlarsimaffianni Qupanummi najugaqartut 43-pput sulisullu 67-iullutik, amerlasuullu coronamut tunillatsissimapput.
- Najugaqartut affai sinnerlugit tunillatsissimalernikuupput, sulisullu aamma affai sinnerlugit tunillatsissimalersimallutik, Peter Mattaaq oqarpoq.
Qeqqata kommuniani 692-it tunillanneqarsimasut corona.nun.gl-imi takuneqarsinnaapput.
Tunillanneqarsimasut amerlagaluartut angerlarsimaffiup pisortaa Peter Mattaaq toqqissisimavoq.
- Peruluttoqanngilaq. Takusinnaavara akiuussutissalersuisimaneq sunniuteqarluartoq. Oqitsuinnarmik ilaasa atorpaat malugerpiarnagu, soorlu kakkilertallutik, Peter Mattaaq oqarpoq.
Najugaqartut ilaat anersaartuuteqartariaqartoq
Najugaqartorli ataaseq ippassaq anerniluppoq, silaannalersuullu atortariaqarsimallugu.
- Anersaartuuteqaleraluariarluni nammineq makitalerpoq, atorunnaarpaa.
Angerlarsimaffiup najugaqartui sulisuilu coronavirusimik tunillanneqarsimasut taama amerlatiginissaat ilisimasimanngikkaluarpaat. Nammineq misissuutikkut, tassa antigentestitut aamma taaneqartartunik, misissuereernermi coronavirusi utoqqaat angerlarsimaffiani tuniluutipiloortoqartoq paasinarsivoq.
- Ippassaq quicktesterigatta tassani najugaqartut affai sinnerlugit takussutissaqartut paasivarput, Peter Mattaaq oqarpoq.
Sulisut tunillanneqanngitsut sulinerusariaqartut
Tunillaassuunnerlu pinaveersaartinniarlugu assigiinngitsutigut iliuuseqarput.
- Suli tunillanneqarsimanngitsut iniminneeqqullugit kaammattorpagut.
Ilaqutaasullu nalinginnaasumik pulaartarnerat killilerneqartoq Peter Mattaaq oqarpoq.
- Sapinngisamik sapaatit akunnerini aggersuni marlunni, tamaanga pulaanngikkallarnissaat kaammattuutigalugu.
Pisariaqavitsillugu pulaartoqarsinnaanera mattutivissorneqanngilaq, sapinngisamilli ikittunnguit kisimik isertarnissaat kaammattuutaavoq.
- Soorunami illersuutit maleruagassallu malissagaat kaammattuutaavoq, kisianni nalunngilara aamma pikkoriffigereeraat tamanna.
Najugaqarfimmi sullissinerup naammaginartuutittuarnissaa sulissutigineqartoq Peter Mattaaq oqarpoq.
AAMMA ATUARUK Tamaat isigalugu: Coronavirus pillugu killiffik
Taamaaliorneq sulisut tunillatsissimanngitsut pisarnermit sulinerunerannik anguneqarpoq.
- Ikinnerulaarlutik, arpannerulaarlutik taavalu aamma inussaarutivinnermi sulisussaarunnermi sulisut sulinerulaarsinnaanissaat aamma upalungaarsimanertut atorpagut. Akunnerni amerlanernik sulinerulaarlutik taamatut aaqqiissuteqarnikuulluta aamma.
Utoqqaat angerlarsimaffiani pisortap tunillaassuunneq qanga siaruaatilertorsimanersoq ilisimanngikkitsik aamma oqarpoq. Sapaatip akunnerata naaneranili arlallit nuffaserlutik aallartissimasut oqarpoq.
