Sisimiuni tunisassiorfimmi sulinermi pissutsit misissueqqaarfigineqalersut
Royal Greenlandip nittartagaani tamanna allaaserineqarpoq.
Aalisakkanik tunisassiorfinni sulinermi pissutsit pillugit misissuinissaq, Royal Greenlandimit isumassarsiaavoq ingerlanneqarnissaanilu inuup inuiaqatigiillu pissusiinik misissuisartut Antropologerne ApS suleqateqalugit ingerlanneqassaaq. Misissuineq Sisimiuni suliniutitut misissueqqaarnermik aallarnerneqassaq, SIK-lu suleqatigineqassalluni. SIK ilaasortami soqutigisaannik aallusserusulluni misissuinissami peqataarusussimasoq KANUKOKA peqatigalugu misissuinissami kaammattuiniarluni tapiissutinik pissarsisimavoq.
Sulinermi pissutsit pillugit misissuinissami pingaarnertut sulisunik amerlanernik ukioq kaajallallugu sulisoqalernissaq qulaajaavigineqassaaq, pingaartumillu tunisassiorfinni ulapaarfiup nalaani aalajaatsunik sulisussaaleqisarneq sammineqassaaq, tamatumanilu paasissutissanik aaqqiissutissatut ineriartortitassanik katersisoqassaaq.
- Tunisassiorfitsinni aalajaatsunik sulisoqarnerulernissarput kissaatigaarput, sapinngisamik najukkamit sulisoqarnikkut imaluunniit Kalaallit Nunaata sinneraneersunik sulisoqarnikkut. Nunatsinneersunilli sulisoqarsinnaaneq angusinnaanngikkutsigu periarfissat kingullersaattut sulisussanik nunatta avataanit tikisitsisariaqarpugut, Attaveqarnermut Sulisoqarnermullu Pisortaq Jens K. Lyberth misissuisitsinissamik isumassarsisuusoq oqarpoq.
Jens K. Lyberthip erseqqissarpaa tunisassiorfinni sulisut 80 procentii aalajaatsuummata aammalu 20 procentit sinneruttut aalajaatsuunnginnerannut peqqutaasinnaasut qulaajarlugit misissuivigineqassasut.
