Sisimiuni timersortarfissuaq oqoqartoq
Timersortarfimmiinneq peqqissutsimut navianarpallaarpoq, paasissutissiilluni ataatsimiisitsisoqarmat arfininngormat tamanna tamanut nalunaarutigineqarpoq.
Timersortarfik atortuilu nutarterneqassappata 12 millionit koruuninik akeqassaaq, aamma oquup piiarneqarnissaanut pinaveersaartinneqarnissaanullu 3 millionit koruunit pisariaqartinneqarput.
Aningaasalli taama amerlatigisut Sisimiut Timersortarfiata piginngilai. Timersortarfik imminut pigisuuvoq kommunimiillu tapiiffigineqarneq-ajorluni.
Qeqqata Kommuniata aningaasatigut ikiuussinnaanera naatsorsuutigineqarsinnaanngilaq, Qeqqata Kommuniata 2016-imut missinngersuutaani timersortarfiit aserfallatsaaliineqarnissaannut aningaasaliisoqarsimanngimmat.
Sisimiuni timersortarfiup matusariaqarnissaa atuisartunut annertuumik eqquissaaq, siulersuisuni siulittaasoq Erik Jensen oqarpoq:
- Sisimiut timersortarfiat illoqarfimmut maanga pingaarutilerujorujussuuvoq piorsarsimassutsikkut assigiinngitsutigullu aaqqissuussani sutigut tamatigut timersortarfik timersornerinnaanngitsumut timersortartut pingaartorujussuarmik atortarpaat, kisianni aamma atuarfiit allallu aaqqissuusisarnerit eqqarsaatigalugit Sisimiut timersortarfiat maani pinngitsoorneqarsinnaanngilaq taamaattumik pingaarutilerujorujussuuvoq ammaannarnissaa, Erik Jensen KNR-imut oqarpoq.
Sisimiuni timersortarfeeraq Mini Hallen atuartunit aamma unnukkut atuartitsinernut taamaallaat atorneqartarpoq, taamaattumik Sisimiuni Timersortarfiup nutarterneqarnissaanut aserfallatsaalineqarnissaanullu kommunimi politikerinut piumasaqartoqartoqartariaqartoq Erik Jensenip oqaatigaa.
