Sisimiuni teriannissat perlerortut toqunneqarput
Sisimiuni qimminik toqoraasartut maajip qiteqqunneraniit ulapaarsimapput, tassa taamanili terianniaq aallaaneqarmat paasineqarlunilu perlerortuusoq. Ukioq ataaseq aatsaat qaangiuppoq kingullermik Sisimiuni perlerortoqarmalli maannalu perlerortoqaqqilersimasoq Atuagagdliutit ullumi saqqummersuni allaatigineqarpoq.
Qujanartumik qimminik perlerortunik suli naammattuuisoqanngilaq, taamaattorli najoqqutassat naapertorlugit qimmit angalaannartut toqorarneqalerput.
Maajip 16-iata kingornagut qimmit angalaaginnartut 25-t toqunneqarsimasut qimminik nakkutilliisoq David Møller AG-mut oqaluttuarpoq.
- Soorunami qimmit toqorarnissaat pinaveersimatinniaraluarparput. Taamaattumik qimmiutillit qimmitik angalaaginnartut inissaannut pitussagaat kajumissaarutigissavarput, David Møller oqarpoq.
Qimmiutillit qimmimik angalaaginnartut tigunissaat ajornartorsiutigigunikku qimminut tigusiniutinik kommunimut atorniarsinnaapput.
Tamatuma saniatigut qimminik nakkutilliisoq ikiortaalu qimmit akiuussutissaannik kapoorisarput.
Maajip 16-iata kingornagut teriannissat arfinillit toqunneqarput. Ullut tulliuttut 14-it ingerlaneranni teriannissanik perlerortunik nassaartoqaqqinngippat mattussineq upalungaarsimanerlu atorunnaarsinneqassapput.
