Sisimiuni suliffissaaleqisut marloriaatinngorput

Sisimiuni suliffissaaleqisut 2009-mi januaarimi 130-usinnarlutik ukiormanna januaarimi 302-nik amerlassuseqalersimapput. Tamanna takuneqarsinnaavoq Qeqqata kommunalbestyrelseata sisamanngorneq apriilip 28-at ataatsimiinnissaani kisitsisini agguaanneqartuni.

- Suliffissaaleqisut amerlinerannut pissutaavoq Royal Greenlandip suliffissuata qaammatini pingasuni matoqqagallarsimanera, Qeqqata kommunia taama nalunaarpoq aammalu suliffissuaq ammaqqippat sulisut ikinnerusussanngortut ilanngullugu nalunaarutigalugu.

- Suliffissuaq apriilimi ammaqqikkuni sulisui 35-nik ikilissapput. Sulisut suliunnaarsinneqartut neqeroorfigineqassapput pikkorissarnissamut soorlu oqaatsinut, suliffinnik aallarnisaanermut aamma eqqiluisaarnermut, Qeqqata kommunia taama nalunaarpoq.

Namminersorlutik Oqartussat 642.000 koruuninik aningaasaliipput Royal Greenlandimi soraarsitaasut suliffinnut allanut piukkunnarsarnissaannut atugassanik.

Maniitsumi suliffissaaleqisut ikiliallalaarsimapput ukiormanna januaarimi suliffissaaleqisut 174-ullutik 2010-mi januaarimi 195-usimallutik.