Sisimiuni Siumut nassuiaaqqusivoq

Inatsisartut Aningaasaqarnermut Ataatsimiititaliaata siulittaasulerneqarneranut atatillugu pisunut Siumup immikkoortoqarfiisa annerit ilaat, Sisimiuni immikkoortortaqarfik, nassuiaasoqarnissaanik piumasaqarpoq.

- Pisut tusagassiuutaannartigut malinnaaffigaagut, tamannalu pillugu Siumup qullersaqarfiata nassuiaateqarnissaa aamma uagut kissaatigaarput, Sisimiuni Siumup siulittaasua Thor Kristoffersen oqarpoq.

Simon Olsenip Aningaasaqarnermut Ataatsimiititaliami siulittaasunngortinneqarnera Sisimiuni Siumup atorsinnaanngitsutut nalilerusunngikkaa Thor Kristoffersen oqarpoq.

-Tusagassiuutit aqqutigalugit tusakkavut tunngavigalugit inunnik ataasiakkaanik nalilersuinissarput orniginngilarput, taamaattumillu qullersaqarfik tusarfigeqqaartinnagu oqaaseqarusunngilagut, isumaqaratta Siumup iluani pissutsit tusagassiuutit aqqutigalugit taamatut avammut saqqummiunneqartarnerat toqqissisimanngitsuusoq, pissutsit taamattut partiimut nakussassaataanngilluinnarmata Thor Kristoffersen oqarpoq.

Siumut Sisimiut allagaat siulersuisuunernut nassiunneqareersimapput.

Sisimiuni immikkoortortaqarfiup nassuiaaqqusinerata saniatigut, Nuummi, Ilulissani, Oqaatsuni, Uummannami, Qaqortumilu immikkoortoqarfiit pisunut isornartorsiuipput.