Sisimiuni Siumut amerlanerussuteqaqqippoq

Sisimiuni kommunalbestyrelsemut qinerseqqinnermi partii Siumut isertitaqarnerpaaqqippoq.

Sisimiut kommunalbestyrelsea 13-inut inissaqarpoq, ippassarlu qinersinermi Siumup isertitai, apriilip tallimaani qinersineqarmat arfineq marluusut nikinngillat. Taamaasilluni massakkut Siumut sinnerlugu borgmesteriusup Hermann Berthelsen-ip borgmesteriuinnarnissi qulakkeerpaa. Hermann Berthelsen aperaarput amerlanerussuteqarnertik qanoq atorniarneraat:

-Tassa qularnaatsumikSiumut amerlanerussuteqaqqippoq, tamannalu oqaluttuarpoq soorunami Siumut borgemestereqartitsisussanngortoq. Taamaattorli aamma oqaluttuarpoq partiit allat periarfissaqartut uagutsinnut saafiginnissinnaallutik. Taakku anguniagaat assigiinngitsut uagut anguniakkatsinnut qanittuuppata soorunami oqaloqateqarsinnaavugut, tassami amerlanerulluta oqaloqatigiissutigisinnaajuaannartariaqarpagut Sisimiut kommuneanut tunngasut, Hermann Berthelsen oqarpoq.

Partiit allat Inuit Ataqatigiit Atassut Demokraatillu kommunalbestyrelsemut isertitaat apriilip tallimaani qinersineqarneratut aamma nikeriaateqanngillat. Ippassaq qinersinermi taaguunneqarnerpaavoq Hermann Berthelsen 566-inik taaneqarsimasoq, tulliuvoq Demokraatineersoq Palle Christiansen 253-inik taaguunneqartoq pingatsiulluni Inuit Ataqatigiinneersoq Agathe Fontain 241-inik taaneqarsimasoq. Sisimiuni Atassut sinnerlugu kommunemut apriilimi qinersisoqarmat iseraluartoq Søren Alauffesen ippassaq qinersinerup inernera tunngavigalugu Agathe Martha Storch -imit taarserneqarpoq.