Sisimiuni Royal Greenlandi saarullinnik tunisassiortalissaaq.

-Ini tunisassiorfiusussaq piareersarneqarpoq, qerinasuartitsiviit ikkussornikuupput, initaalu suliarineqarluni massakkut. Maajip aallaqqaataani immaqaluunniit maajip aappaani, pisiortorneq qerititerinerlu saarullinnik aallartittussaavoq. Sisimiuni Royal Greenlandimi pisortaq Vivi Høy Labansen taama oqarpoq.

- Saarulliit peruttulerpata naatsorsuutigivarput ulloq unnuarlu qerititerissalluta.

Sisimiuni Royal Greenlandip saarulliit iluanaarutigerujussuassallugit naatsorsuutiginngilaat. Aningaasallu isertinneqartussat iluanaarutigineqarnissaat ilimaginagu. Taamaakkaluartoq nunatta kitaatungaani saarulleqarlualersimanera atorluarniarpaat, inuiaqatigiinnut iluaqutaanissaa anguniarlugu.

Vivi Høy Labansenip sulisunik nutaanik sulisoqalernissaa naatsorsuutiginngilaa. Sisimiuni Royal Greenlandimi assagiarsunnik tunitsiviata atorunnaarallarnera peqqutigalugu assagiarsulerisuusimasut saarullilerinissaat siunertarigamiuk.

- Assagiarsulerisarnikuusut soorunami neqereeroorfigineqarumaarput siullersaallutik maani sulisinnaanerannut, apeqqutaalaassapput ilai unnukkut unnuakkullu sulisinnaassanersut, kisia naatsorsuutigikannipajaarparput suliumaartut, Vivi Høy Labansen taama oqarpoq.