Sisimiuni qinersiartortoqarluarpoq

Sisimiuni kommunalbestyrelsemut aappassaanik qinersineq ullaaq nalunaaqutaq qulingiluanut ammarneqarpoq.

Sisimiuni kommunemut qinerseqqinnermut apriilip tallimaani qinersinermi Malik Berthelsen-i qinersisinnaananilu qinigassanngortinneqarsinnaanngikkaluarluni qineqqusaartut akornanni allassimasimanera pissutaavoq. Taama pisoqarnera Sisimiuni apriilimi qinersinerup kingorna illuatungiliuttunngortut naammaginagu naammagittaalliutigaat, naammagittaalliuteqarnerallu Qinersinermut Ataatsimiititaliamit ilalerneqarpoq.

Qinerseqqinnerlu qinersisartunit atorluarneqarneqarniannguatsiartoq Sisimiuni qinersisitsivimmit oqaatigineqarpoq, qulinngulernerani qinersiartortut qinersinermut siulianut sanilliullutik amerlanerusut, Sisimiuni qinersisitsisoq Marie Louise Olsen oqarpoq.

-Nalunaaqutaq qulinut 253-it qinersiartorsimapput, procentinngorlugu 6, 97 %, apriilip tallimaanut nalæeqqiullugu annerulaarluni 2,78 %-imik. Taava aqqanermut qinersiartorsimasut 449-it qinersiartorsimapput, 12,37%-it apriilimi qinersinermut sanilliulluni 3 %-imik annerulluni.Taava ulloqeqqanut 664-it qinersiartorsimapput tassa 18,29 %-it apriilimi qinersisoqarmat ulloqeqqanut qinersisimasut 16,06 %-it qinersisimallutik.

Ullaap tungaani qinersiartortoqarluarnerunera ullup sinneranut sunniuteqarluassappat, ullumikkut qinersiartortut 70%-iunissaat ilimagineqarpoq.

Sisimiuni ullumikkut qinersineq pissanganariaannaasoq oqaatigineqarpoq illuatungiliuttutut inissikkaluartut katersuutilersimammata.