Sisimiuni qinerseqqittoqassaaq
Sisimiuni kommunalbestyrelsemut qinerseqqittoqassasoq, qinersinermut ataatsimiititaliap ullumi aalajangerpaa.
Sisimiuni qinersinermut siulersuisut takkorliuillutik kukkusimanerat akuerineqarsinnaanngitsoq qinersinermut ataatsimiititaliap naqissuserpaa.
Malik Berthelsenip qinigassanngortissinnaanermut qinigaasinnaanermullu piffisaliussaq naammassisimanngimmaga, qinersinerlu aallartereersoq aatsaat paasineqarmat, Sisimiuni qinersinermut siulersuisut kukkusimasut Namminersornerullutik Oqartussani qinersinermut ataatsimiititaliami ilaasortat isumaqarput.
Sisimiuni qinigassanngortittut qinersinermut allattorsimaffimmut naleqqersorsimanngilaat.
Malik Berthelsenni qineqqusaartussat allattorsimaffianni allassimasimavaat, inuit allattorsimaffianni, qinersisinnaasullu allattorsimaffianni ilaasimanngilaq, qinersinermilu suliaqartunit paasineqarsimanngilaq, kukkunerlu tassaniittoq annertuallaartorlu qinersinermut ataatsimiititaliap siulittasua Kaj Kleist oqarpoq. Kommunalbestyrelsemut qinersisarnermut inatsit najoqqutaralugu piaartumik qinerseqqittoqarnissaa aalajangiunneqarpoq.
Qinersinermut ataatsimiititaliap siusinnerusukkut aalajangiukkaluarpaa Malik Berthelsenip taasisai 215-t Siumumut tutsinneqassasut, tamannali aamma kukkunerusoq qinersinermut ataatsimiititaliap nalilerpaa.
Sisimiuni kommunalbestyrelsemut qinigassanngortittut tamarmik, Malik Berthelsen minillugu, qinigassanngorteqqissapput, tassalu marlunngorpat majip pingajuani Sisimiuni kommunalbestyrelsemut qinerseqqittoqassaaq.
Sisimiuni kukkuneq tunngavigalugu qinersisarnermut inatsit allanngortinniarneqartariaqassasoq qinersinermut ataatsimiitialiap qularinngilaa. Kalaallit inuusuttut nunanut allanut ilinniariartalermata qinigassanngortittalersimanerallu aallaavigalugu periarfissiuunneqarnissaat innersuussutigineqassaaq.
