Sisimiuni qinerseqqittoqarataannaavoq
Kommunalbestyrelsenut qinersereernerup kingorna qinersinermut ataatsimiititaliap akuerineqarsinnaanersoq ullumi aalajangiiffigissavaa.
Qaanami Sisimiunilu qinersineq akuerineqarsinnaanersoq ataatsimiititaliap isummerfigisussaaniassavaa.
Qaanaap kommunalbestyrelseanut kikkut qinigaanersut erseqqinnerusumik oqaatigineqarsinnaalissasoq, qinersinermut ataatsimiititaliap siulittaasuata Kaj Kleistip oqaatigaa.
Qinersinermut ataatsimiititaliap Qaanaami qinersineq atorsinnaanngitsutut aalajangiukkallarpaa, taasinerit kisinneqareernerisa kingorna nalunaarutigineqarneri tatiginanngimmata.
Sisimiuni aamma taasinerit apeqquserneqartariaqalermata qinersinermut ataatsimiititaliap isummerfiginiassavai, imaarataannaavormi Sisimiuni siumup kommunalbestyrelsemut qinigaatitai ikinnerulissasut,
Sisimiunimi qinersinermut siulersuisut borgmesterertik siuutuliullugu maluugiitsuugaqarput. Siumut sinnerlugu qinigassanngortikkaluartoq Malik Berthelsen qinigassanngortissinnaananilu qinigaasinnaanngitsoq paasineqarpoq, nunatsinniittussaaneranut piffisaliussaq sivikippallaarmat.
Qinersinermut ataatsimiititaliap Malik Berthelsenip 215-nik taaneqarnera siumumut tutsinneqassasut aalajangiuppaa, aalajangiinerlu Sisimiuni qinersinermut siulersuisut naalaannarpaa.
215-nilli Malik berthelsenimut taasinerit ilumut akuerineqarsinnaanersut qinersinermut ataatsimiititaliap ullumi aamma akuerissanerlugu aalajangiutissagaa, Kaj Kleistip radioaviisimut oqaatigaa.
Sisimiuni Inuit Ataqatigiit, Atassut Demokraatillu Malik Berthelsenip taasisai siumumut nuutiinnarneqarneri qinersinermi peqquserlunnertut isigalugit naammagittaalliutigaat, qinersinermullu ataatsimiititaliap isummani allanngortinngippagu eqqartuussivilersuusiniarlutik siorasaarutigaat.
Malik Berthelsenip 215-nik taaneqarnera atorsinnaanngitsutut nalilerneqassappat, Sisimiuni siumut amerlanerussutaarutissaaq, Sisimiunilu kommunalbestyrelsemut qinerseqqittoqarataannaavoq.
Qinersinermut ataatsimiititaliami ilaasortaappput, Kaj Kleist, KANUKOKAp pisortaa Martha Labansen kiisalu biskoppi Sofie Petersen.
Qinersisarnitsinnut atatillugu allamik aamma ataatsimiititaliaqarpoq, tassaavorlu qinigaasinnaanermut ataatsimiititaliaq, ataatsimiititaliallu aalajangertarpaa inuit ataasiakkaat qinigaasinnaanersut.
